Kumpi nasem numei khatin thusitthuak nupi khat ii ata ngek anawi piaksak

Kumpi nasem numei khatin thusitthuak nupi khat ii ata ngek anawi piaksak

Thukhen zumpisung khatah thusit athuak nupi khat ii atangek pen gilkial in kapkap ahih manin, zumnasem khatin anawi apiaksak laitak Photo kizaihkha in Social Media ah minthang mahmah cih China Daily pan kiza hi.

North China, Shanxi Province, Jinzhong City sung aom thukhenzum Court khatah tukhasung thupiang ahihi. Tua thukhenzum sungah nasemnu pen Hao Lina kici a, amahpen Court zumsung ah Bailiff asem ahihi.

Tua Court sungah nupi khat thusitding in kipaipih a, atangek kha 4 bek aphapan tanumeino pen thukhen zumpisung ah ki lutpih saklo hi. Apualam khawngnading in akibawl Lounge sungah tua naupangpen nutsiatkul ahih manin, Bailiff nasem Hao Lina in nakepsak hi.

Tuabang in thukhenzum apualam ah tua naupangngek akepsak laitak in naungek pen agilkial hidinghiam kapkap hi. Anu pen Court zumpisung ah thusit athuak laitak ahih manin, atangek pen nawi piatheilo hi. Tuaciang in Bailiff Hao Lina inzong tua naungek hehpihhuai salua in, amanawi piaksak hi.

Bailiff Hao Lina pen khangnolai mahmahkhat hi a, ahi zongin amanzong pasal neikhin, ta neikhin in, ta aneihzong sawtnailo ahih manin, anawi nagau bilbel hi. Hihbang in thusit athuak akiman Suspect khat ii tangek pen hehpihhuai salua in nawi apia zumnasem Bailiff Hao Lina ii lungsimpen thupi kisa mahmah a, anawi piaklaitak zong Photo khat kizaihkha hi.

Tua Photo pen Social Media ah aki khahkhiat ciangin thupi kisa, lamdang kisa in, huntomno sungin Chinese Netizens sungah kizelgawp in, Comment kipia ziahziah hi.

Tua Photo pen huntomno sungin Comment bekbek mi 10,000 val in piangeingai a, Likes zong 100,000 valbang phaziau hi. A gamtatna pen thupi kiza, ki zahtak in, amelzong hoihsawnsawn ahih manin, tuanu pen “the most beautiful bailiff” ci’n ki pahtawi hi.

Netizens pawlkhat te’n agamtatna, midang te ahehpihna, deidan neilo in itna aneihna te thupi samahmah in, ki pahtawi ngeingai hi. Pawlkhat leuleu in nupisa, ta neikhinsa hinapi in, amel asa mahmahzong hoihmahmah laihi ci’n pahtawi uhhi.

More: Restaurant khatin numei te nawi agol aneu tungtawn in Discount pia

Tua Bailiff Hao Lina tungah banghang in tua thusitthuak akiman nupi khat ii atapen nawi piaksak nahihiam ci’n akidot ciangin, tua nupinu pen ata nawiduh piatheilo ahih manin hehpihhuai kasa hi. Keizong tacil aneithak nawipiapia laitak kahihi. Tua naungek pen katanu bangdan in ngaihsun kahih manin, kanawi apia kahihi ci’n genkhia hi. Sawltak #zomidaily