Thungetna mah na thupi veve

Thungetna mah na thupi veve

Tuteng Yangon – Kalay bus tawh aciah peuhmah lamkal ah giakkha hamtang uh hi. Curfew om ahih man in misokte’n zan sung paiding phallo uh hi.

Zanhal (April 23) in zong ka tanaute aciahto om a ong genna vuah: “Nitak nai 9:00 a Malaing tung in misok te’n hong paisak nawnlo uh aih ciang vua Malaing ah giak ung. Lupna ding mun zong om mello in khualum lel aih ciang a lamgei khawng ah lumsuk lel ung e” ci uh hi.

Zan ni Dr. Khen Za Sian hong zinghawh a, “Kawlpi ah vai tuamtuam avan ding in tuni paito ding hi’ng. Na ciahma ong tungsuk kikman kei khaleng kimukha nawnlo ding ih hihteh ci a ong pai hi’ng” acih ban ah “Ñatvehna” ci’n letsong tampi hongpuak neeinaai lailai hi. Zato ah zong a innkuan vua hong vehkhin uh ahih man in kul thuahthuah nawn hetlo hi. Taxi khat bupsap a hongpai hi lailai ahih man in amawtaw sap zong tampi bei ding hi.

Ki awi samlo kahih man in niangtui sai paipih in “Na duh bang bang ne o” kaci hi. Kavengpa Pu Khup Mung zong kasam hi. Sumpiak ding takteh kapiak ding hong phal peuhmahlo hi. Pia teitei leng akitom theiding nam ahihlam tel mahmah kahih man in kapiangam kei hi.

Inn ah thu tuamtuam ka kiho khit uh ciang in hong khukdin suk mawk in: “No nuta mahmah in thu hong ngetsak le uh cin adeih hi’ng” cingiau mawk hi. Ka nuta un deihtak thu kangetsak uh hi.

Tuzing nai 6:00 sat khit deuh in hong hopih a, “Koi lai tungta nai vua?” Kacih leh “Gangaw tungta ung ei” cimawk hi. Lampi ah giak khalo uh hi.

Sia Khen tawh ka kithuah zawh kum 15 valkhinta a tutung zah a aki niamkhiat lam kathei ngeikei hi. Ka niangtui man piak ding cikmah a hong nial ngei hetlo pen tutung tangtel sihtan hong bang keei mawk hi. Lamdang kasa mahmah hi
Sia Laang Pau in “A Ong dingte mah in ak hong puak hi” acih dan mah in thupha ngah dingte mah in thupha zawi atawn uh himawk in ka um hi.

Kisik hetkei in ka um a, tutung akhual zinna zong mazang in lawhcing mahmah ding cih ka um ngiat hi. Thungetna Mah Na Thupi Veve! Amen Mung Laan Thang (Tawmvei, Yangon)