Malaysia Batu Caves leh munpawlkhat ah a ngongtatsawm mi 3 kiman

Malaysia Batu Caves leh munpawlkhat ah a ngongtatsawm mi 3 kiman

Malaysia gamsung aom Entertainment Outlets, Police Stations leh Batu Caves aom Hindu Temple te ah hiam gamtatna ngongtatna aneihsawm mi 3 kiman cih Malaysia Police te’n tuni Wednesday (31 August) ni in tangkokhia uhhi. Hih akiman mi 3 tepen ISIS migilo te ii khutzatmah hihtuakzel uhhi.

Hih mi 3 tengin zanni nitaklam “Malaysia’s National Day” atungmadiak in a ngongtatsawm uh hi a, khutlot Bomb leh thau pawlkhat zatsawm ci’n Police te’n genkhia uhhi.

Hihvai tawh akiman mansapa pen kum 20 gual aphapan Lorry Driver khat hi a, nungkal Saturday ni in Selangor sungah kimankhia hi. Akimat ciangin amatung panin khutlot Bomb khat, 9mm Pistol khatleh thautang Bullet 24 zong kimankhia hi.

Adang khatpa pen kum 27 gualbawl aphapan sasat sasem nasep asemkhat ahihi. Ama kimatkhiatna pen Pahang sungpan cihi.

Adang khatpa leuleu pen kum 20 gualpawl hi a, Drink Seller ci’n lamgei khawngah tuivot azuakkhat hihtuak hi. Hihpa pen Kuala Lumpur khuasung pan akiman ahihi.

Amasa lobuang adang nihte pen Monday ni in akimantuak uh ahihi. Hihtengthum pen Syria gamsung aom Malaysia gammi IS makai khat ii thupiakna tawh agamtatsawm uh ahihi. Tukum June khasung in Night Club sungah khutlot Bomb asukhamsak zong hihpa mah ahihi.

Hih migilo 3 tengpen ahunlap in akimanlo hileh zanni “Malaysia’s National Day” pawibawl in aomkhong kimlai mipi pawlkhat in athuaklawh khatheiding himawk hi. Tuaban ah hih IS tepen kua hiding cih genkholhtheih zong hilomawk hi. Ummawhhuai hetlopipi zong IS migilo tetawh anakipawlsim khinkhian uh hitheimawk hi.

Tukha kipatlam inzong Malaysia gampan in Syria gamah IS tetawh kipawlkhawm in nasemding apaisawm Malaysia mi 68 te Passport kipialo cihi. Palik thukan te genkhiatna ah Syria gamsung ah galkidona hangin March khasung in Malaysia gammi 18 sikhin cihi. Adangzong Malaysia gammi 7 te’n IS te adingin aluangkham in apumpi uhtawh Suicide Bomb puakkhamsak khin uh cihi.

Tuciangciang IS tetawh nasemkhawm te Malaysia gamsung ah hongciahkik akithei omnailo cihi.

Malaysia gamvengkhat ahi Indonesia gamsung ah January khasung in IS te’n Bomb tampi asukkhapzawh akipan Malaysia zong kinakdop mahmahkhin uhhi.

2013 kumpan kipan IS tetawh akizom hiam gamtatsawm migilo 230 Malaysia gamsung ah kimankhiakhin ci a, tualak ah 200 tepen Malaysia gammi ahi uhhi. ZD Sawltak #zomidaily