Thumanna le Cihtakna khahsuah ngei kei in ~ Jam Daniel

Thumanna le Cihtakna khahsuah ngei kei in ~ Jam Daniel

Paunak 3:3: “Thumanna le Cihtakna”, Hih kammal nih pen khen lo a I nisim nuntakna ah zat dingin Pasian hongsawl le thupiak ahihi. Thumanna bek kicing thei lo a cihtakna bek zong kicing lo hi. A nih tuakin tem le pai a bang ding ahihi.

THUMANNA: Cihtakna kulse loin ki thuman thei lua hi. Sum le paii vai ah piak dingte piakna pen thumanna hi. Na muh bangbang a thu khat na gen pen zong thumanna mah hi. Ahi zongin thuman gen, thuman a gamta khempeuh micitak kici kim thei zenzen lo hi. Nisim thu suaksakte (news)ten thupiang bangbang gen uh a khantoh hanhan na om luapi khol lo hi.

CIHTAKNA: Thuman ta kei leng ki citak thei lua hi. Thuman zang lo a zuau gen/guta mithat tamlua lel hi. Khut tung lumlet a bang a sia lamah a citak mi tampi om hi. Tua hangin Pasian in thumanna le cihtakna khen ding deih lo hi. A nih tuak a zat khop ding a hong thupiak ahihi. Cihtakna cih pen kammal dangin gen ni ci leng “hanciamna”, “thasanna” zong kici thei ding hi.

* Hoih lo hi ci a nasep khat pen sem nawn kei ning/zang nawn kei ning/painawn kei ning na cih ni a kipan cihtakna nazat toh ding ahihi. Ahoihloh lam thei napi cin na taksa in duhna/lunggulhna nei hi. Na ci le sa lunggulh tentan na pen nanial zawh tak ciangin a citak pan na hihi.
* Hoih hi ci a natheih na khat pen a sem zelzel hilo ding cin a a semden mi hi ding hi teh. Ahoih na khat hoih hi ci a nasep na ah sep loh theih na ding hong dal thu le vai tampi om thei ding a ahi zongin nasep teitei zawhna pen cihtak na ahihi.

Gentehna (1) Tu kum sung nipi sim kikhop na ah hunlapin tunsawm in ka hanciam ding hi ci-in kumthak na ki-ap hi. Na ki-ap zawh kha khatma in kikhop loh theih na ding/hunlap loh theih na ding thu le vai tuamtuam hong piang ding a na hanciam zek keileh na ki-apna pen zuau gen hong tangsak ding hi. Ahi zongin mi citak na hih nopleh na hanciam tentan ding ahihi.

(2) Tu kum sung kikhopsim in sumpi RM 5 ka khia ding hi ci’n na ki-ap hi. Khatvei nihvei piak ding haksa lo na pi in kikhop sim a piak ding pen hanciam mahmah kul ahihi. Tua ahih manin cihtakna khahsuah lo a na kalsuan theih na dingin gelkholh siamna zong kisam mahmah hi.

Muhtheih thupha tampi I san theih na dingin cihtakna tampi kisam hi hang. Hong huh ngei khat na va huhkik pen na huhkik zawhnakleh huhkik ding a thuman khat mah ahihi. A man hong huh masa ahih manin nang zong na huh zawh tak ciang ahuh na hihi. Ahi zongin Mother Teresa nuntakna en leng Culkata khuapi sung a om mizawng teng kai khawm in an vak hi. Cidam lote pua in a inn ah kem a zatui tawh bawl hi. Ni khat nasep ding hileh mi tampin sem zo ding hi. Ahi zongin a ma nasep pen khantawn nasep ahihi. A sih dong nasep ahihi. Haksa mahmah hitaleh a cihtak man, a hanciam man bekbek in lawhcinna a ngah ahihi. A sihma ahi zongin a sih khit ahi zongin pahtawina min phatna tuamtuam ngah toto a tangthu manpha mahmah a gelh khia numei manpha khat suak hi. Ngah kik ding lamet na tawh nasem lo bek hi lo in a sep bangbang hanciam in lungsim khempeuh tawh a semnu ahihi.

Bang hang thumanna le cihtakna zat ding kisam I hiam?
Mi gualzo mi lawhcing I hih theih na ding ahihi. Gualzawhna lawhcinna cihte ki mawk ngah lo hi. Thaman piakkul hi. Haksa taleh na hanciam tentan na pen na thamanpiak ahihi. Thagum le pilna suang a nasem mi khat thaman kimawk mangngilh theilo hi. Sepna thaman sang hamtang ding hi. Hebrew 12:11 ah “…thuman nuntakna hangin nopsakna thaman a nungngah uhi” Mang muhna 2:10 “…Na sih dongun kei tungah hong citak un. Tua hileh nuntakna lukhu ka hong pia ding hi”. Jam Daniel