Thumaanna le Thumanna

Thumaanna le Thumanna

Justice and Obedience

Khatna ah, thumaanna pen Justice ahih kei leh righteousness zong kici hi. Thumaanna le dikna pen a kibang ahi hi. Midikte thumaan uh hi. Dikna pen upna bek tawh kingah hi. The righteous shall live by faith (Rom. 1: 17). Thumang lote thumaan lo uh hi. Nihna ah, mi khat in thu a man’loh manin mi tampi mimawh a suahsak mah bangin mi khat in thu a man’na hangin mi tampi in Pasian tawh kipawl theihna a ngah ding uh ahi hi. Tangmi Jesuh Khrih in eite khempeuh tang dingin Pasian’ kalh ahi thumaanna le thumanna ong piak sak zo hi.

A tunga tawh kisai in Khrih in mawhnei eite’ adingin a genbaang lo thumaanna tawh thumanna (active obedience) le a genbaang lo thuakna tawh thumanna (passive obedience) ong sep sak hi. Lai Siangtho sungah thumaan mi kuamah omlo, midik kuamah omlo (Rom. 3: 10) a cih laitak in Khrih pen genbaang loin thumaan hi, dik hi. Tua ahih manin Lai Siangtho sungah Pasian’ gam le a dikna na zong masa un, ci hi (Matt. 6: 33). Pasian ukna pen Pasian’ deihna hi a, Pasian’ deihna pen Jesuh’ dikna thu ahi hi. Jesuh Khrih’ dikna, Jesuh Khrih’ thumaanna (the righteousness or justice of Christ) tawh Pasian’gam zon ding ahi hi.

A langkhat leuleu ah, thu-ummite pen Jesuh’ thuakna sungah upna tawh a thuak mi ih tang khin hi. Amah Singlamteh tung nangawn ah sih ding a ut hi (Phil. 2: 8). Jesuh’ zuihna le thuakna ih kisam hi. Thukham khempeuh eite’ tang dingin genbaang loin a zuih kul ahih manin Jesuh in a nuntak sung khempeuh ah genbaang loin na thumaan zo hi. Mawhna thamanh thuak loh phamawh ahih manin Jesuh in genbaang loin eite’ thuak tawntung nading mawhna gu na thuak khin zo hi (John 19:30). A zo zo hi. Diktang mi ih hih theih nadingin Jesuh’dikna ih kisam hi. Thuaktang mi ih hih theih nadingin Jesuh’ thuakna ih kisam hi. Thuak dinga kisam thumanna Jesuh in mang hi. Zuih dinga kisam thumaanna Jesuh in zui hi.

Khrih ii Thumaanna (Active Obedience of Christ)
Leitung ah Jesuh a nuntak lai in, a Pa’ deihna bang bekin nungta hi. Pa’ thu mang hi (Matt. 26: 39). Tuni in Jesuh’ thumaanna hangin thu-ummite zong thumaan theihna suangdalhamphatna Pasian in ong pia hi. Na pianthak ma-in na hanciamna khempeuh thumaan lohna hi a, ahi zongin na pianthak khit ciangin na hanciamna zahzah Topa in thumaanna in ong ciapteh sak hi. Tua pen Jesuh’ thumaanna liim nuai ah upna tawh a nungtate ih hihna hang ahi hi. Jesuh ze-etna khempeuh ah puk lo hi. Thukham sawm khempeuh zui zo hi. Zuih sim nei lo hi. Zui siang hi. Zuih khem nei lo hi. Zui takpi hi. Thumaan gen hi. Im lo hi. Hun zui a thugenna ah thumaan ki-im hi. Galkap kumpi hun ah gen lo ding, Mipi thuneih hun ah gen pan ding, ci lo hi. Thumaan gen nadingin hun tawh gi khen kei ni. Thumaan pen gen tawntung ding ahi hi.

Khrih ii Thumanna (Passive Obedience of Christ)
A mite’ adingin a thuakna le a sihna pen thumanna ahi hi. Jesuh pen thumaanna bek hi loin thumanna tawh zong kidim hi. Gimna hai tawh kipel nuam hi. Ahi zongin Pa’ deihna bang hi hen, ci hi. Hih bang thute pen thumanna (passive obedience) kici hi. A thuak dingin a kiging sa ahih manin lau lo hi. Migilote’ bawlsiat dingin kiphal hi. A taktak in ci lehang a mite’ mawhna tangin Jesuh bawlsiatna le sihna a thuak sak pen Pasian mah na hi gige hi (Sawltak 2: 23). Pasian mah ong kisik tawm hi. Ong piakhia hi. Ong thuak hi. Ong si hi. Tho kik hi.

Thumaanna le thumanna cih kammal pen kibang lian lo hi. Ahi zongin a nih in a kikhen khia thei lo sumtang a bang ahi hi. Pasian’ mai ah nang le kei tangmi dingin a thumaan zo Jesuh Khrih bek om hi. Nangle kei’ tangmi dingin singlamteh tung nangawn ah sih ding thu a mang zo Jesuh Khrih bek om hi. Jesuh pen a thumanna ah zong thumaan hi. Thumaan zolo pi in thumang ahi kei hi. Thumaanna le thumanna. Kuamah in a nuntakna lak sak thei lo hi. Amah le amah ong kipheikham tawm hi zaw hi. Ka kisial a, ka kiphong kik hi, ci hi (John 10: 18). Kum 33 a phak hun in ze-etna khempeuh le langpanna khempeuh thuaka, ahi zongin genbanna khat zong om loin thukham khempeuh tawh kituakin thumaan zo hi. Zomi ading Thumaanna le Thumanna hi. We need the Justice and Obedience of Christ. Justice is active.

Evan. Suang Dal