Thumaan pan Thumaan-thutak ah

Thumaan pan Thumaan-thutak ah

Thumaan in bang gen? Thutak in bang gen?

Mihingte in thu ih gen peuhpeuh a maan dinga ih kaih gen ahi hi. Thumaan in a maan thu nam khat mah gen hi. Na hauh nop leh hau phot in. Asia lakah a hoihte a hoih taktak hi. Thumaan gen le sazaang kap. Maan sui lehang kitam hi, cih dan peuh hi. Hih kiim le paam paunakte kisut kiphelh nadingin a thukhel maan mahmah hangin thutak maan lo mawk hi. Amaan bek pen tak lo hi. Tua ahi manin thumaan pan thumaan thutak ah Lai Siangtho in hong hilh hi. Thukhel pilna pen Mangpau in Philosophy kici a, thumaan thutak pilna pen Theology kici hi. Tulai hun ah zong Ph.D Philosophy bekbek ki-uang sak pian ta hi. Lamdang ka sak khat: Lai Siangtho sangkah tata tengin tatkhiatna thu gen cih thadah Jesuh’ min zong muang nawn lo-in leitung pilna le khantohna bekbek gen a, leitung pilna lam sin, Lai Siangtho sangkah khol lo tata teng in heuh gupkhiatna thu hong hong nial nuam mahmah se uh hi. Tua zong pen thumaan lo khat ahi hi. Upside down…

Gulpi in numei kiangah, “Na si kei ding uh hi. Banghang hiam cih leh tua singgah na nek ciangun na mitte hong vak ding a, a pha le a sia thei-in, Pasian tawh na kibat ding lamtak uh Pasian in thei hi,” a cih ciang pen a thumaan kici thei mah ding hi. Tua daanin Satan in zong thumaan a gen hi ci uh hi (Piancilna 3: 4-5). Satan thumaan gen suah zawin Eve zuau phuak tang sak pian uh hi. A taktakin ci lehang Eve pen thumang lo hi bek a, Satan ahi leh zuauphuak pa mah ahi hi. Satan in thumaan ciang bek gen a, thumaan thutak gen lo hi. Nambat faw kisun leh tawl khat lungnuam mahmah ding hi. Ahi zongin tua pen lungnopna zon zia ding hi lo ahi manin, nambat faw kisun lecin na lung hong nuam mahmah ding hi ci a, khangno khat va hanthotna pen zuau thu genna mah ahi hi. Banhang hiam cih leh tua a nambat faw hanga lungnopna khit ah tua nambat faw hanga a piang ding sihna thu ipna pen zuau thu ahi hi. Tua ahi manin Satan pen zuau gen mah ahi hi. Lai Siangtho ah Satan pen zuau thei pa mah na ci hi. Johan 8: 44.

Thumaan thutak ahi tua Pasian’ thukham bang lian up lohna pen zuau thu kipatna ahi hi. Banghang hiam cih leh Pasian in “…singgah na ne kei ding uh hi,” ci napi-in, Satan in na nek uh hangin “na si kei ding uh hi…” cih pen zuau thu hi khin zo hi. A pumpi uh a sih pah loh hangin Satan thumaan gen hi tuan lo hi. A mit uh hong vakin, khua phawkin a guaktangin a om lam uh a kitheihna uh pen Satan’ zuau thu a zuih man uh na hi zaw hi. Tua hi a, Piancilna 3: 4-5na ah Satan thu gen pen thutak vet lo ahi manin thumaan zong hi vet lo pah hi. Satan’ thumaan in thutak suah zo lo hi. Pasian’ thutak in thumaan suah zo bek hi. Ahi zongin thumaan le thutak pen sumtang bangin a kikhen khia thei lo ahi hi. Satan’ thugente pen a lang maan a lang maan lo (half truth) vive hi bek a, Pasian’ thugente pen a taktak ahi manin a vekpi in maan hi. Thumaan pan Thumaan thutak ah ciah kik ni.

Evan. Suang Dal