Thulu neilo thu ~ Lian Tuang

Thulu neilo thu ~ Lian Tuang

1 Aksi le khatang lim nuai a aluang hiauhiau huihkhidam in zanpak namtuite mel hoihna ong puak kawikawi ciangin leikeu tunga guahmal kia bangin mihingte lungsim pumpi ong nosuak sak a, zan khuamial sung nangawn hoihna lungkimna tawh ong kidim sak hi.

Zanpak in tua thute a thei kha mah ding hiam.

2 Gamsimtham gammang tulakah gamdai takin ka om hithiat hi. Huih nunna hangin singtheh kitat a ging thialthialte ka za hi. Singhiang khawmah vasate khazapna ging phalhphalh a, tuipi tunga tuihualpi bangin kuampi dimin vasate ham zaizai in luang hanhan hi.

Tua kawmkawm in khat le khat a kidawng diamdiam Pengpelepte kihona ka zak lailai ciangin khuaizu bangin ka bil ah khum zungzung a, ka lung ong nuam sakin ka tha ong dim sak hanhan hi.

Amaute hangin lungdam in ka tha dim tuam ahihna vasate Pengpelepte in a thei kha ding hiam.

3 Ka tutna kho sang tung panin ka khuadakdak hi. Singtehte a mel tuamtuam ahihna ka mu kha hi. Ka mai a gamkuampi bup nim dildial in, ka gal a om mual lianpite a dum dide hi. Ni a liapna munte dumzaw lai hi. Mual lianpi tampi kigual toto a, a tawpna ah meilum kai zilzel tawh kihual khawm hi.

Tua zom ah ka et toh leh vandumpi na hi hi. Siang sinsen hi. Van dumpi laizangah phialphiah vasate a lomlom in kimawl zaizai uh a nuam sa mahmah uh hi. Tuateng ka etet ciangin ka lungsim dai hithiat in nuam ka sa mahmah a, hun bei lam zong ka phawk kha kei liang hi. Lungsim tawldamna lianpi ka ngah hi.

Amaute tungtawn in a kigentel zolo hamphatna lianpi ka ngahna thu maulte guamte huihte singtehte vasate in a thei kha ding uh diam.

4 Omna kibanglo ahih hangin a hunhun in innkuan ( unauteng )kimuh kikholh ding ka hanciam ngaihsut mahmah uh hi. Lungzuanna khasiatna tampi nungah hih bangin u le nau a dam lai sun teng kimuh khopzel pen huihpi guahpi nunga Ni tang kik silsial bangin tha thak lametna thak le lungmuanna thak tampi ong guan hi.

Zan mangsia sung pan khanglo in ka mang na hi bilbel in phadawm mahmah ei ci in i tawldam mahmah tawh kibang hi. A nop in nuam zungzung mai hi.

Zanpakte,mual le guamte, vasa le vandumpite hangin lungsim pumpi tawldamna le thathak tampi a kingah theihmah bangin thu hamsa tampi nungah unau pate kikhawlkhawm lingling in nuam sa khawm lingling uh hi lo maw ci in midang khat peuhpeuh in zong lungdamna thalakna lungkimna tawldamna in a na nei kiukiau kha tam maw ci in ka deih bawl mahmah hi. Lian Tuang