Thucinh thutang (L)

Thucinh thutang (L)

Lungkiatna pen guallelhna hi.

Lauhuaina tawh kidim leitungah Topa i beel ding hi.

Leitungah bangzah takin na hau/pil phial zongin, Jesu na neih kei leh a tawpna-ah a mawkna hi veve ding hi.

Leitung hauhna in hong lunggimsak lel dinga, kha hauhna in lungnop tawldamna kicing hong pia ding hi.

Leitung thu-in hong lunghimawhsak a, Pasian thu-in hong lungmuangsak hi.

Leitung thu-in hong kikhensak a, Pasian thu-in hong kipumkhatsak hi.

Leitung thu-in hong thanemsak a, Pasian thu-in hong thahatsak hi.

Lungdam kohna in ngahsa thuphate kipsak a, ngah nai loh thuphate ngah theih nading lampi hong honsak hi.

Lutlut napi-in a paikhiat kei leh bel a tawpna-ah kisia lel ding hi.

Lametna tawh kalsuan in, sepkhiatna tawh i kizomsak ding hi.

Laptohna ahi-a, niamkhiatna ahi zongin Topa’ khut sung bekah om hi.

Leitung in kei hong nial-in, Satan in hong do hang, Jesu hangin ka ma ka tun’ ding hi.

Laptohna maan taktak pen, Topa kiang pan hong pai hi.

Lungsim leh pumpi ki-uk zawh lohna pen, haksatna leh gimna lianpi khat hi.

Lampi tuamtuam tampitak om hi. Na teelsiam kei leh nangmah gim/sumh lel ding hi teh.

Lamto(lam haksa) i pai nak leh lamphei(lam nuam) in hong ngak cih i tel ding hi pah hi.

Lawp mahmahna tawh amah phat in a bia mite tungah, Pasian in na lamdang semin, a ki-imcip thulianpite hilh hi.

Lungnopna taktak pen Pasian kiang pan bekin i ngah thei ding hi.

Lauhuaina om ahih manin lau ding hi mah a, ahi zongin lauhuaina sung panin hong liah/dal zo ding Pasian nei ihih manin, amah bel a, lungmuang taka om ding hizaw hi.

Lungkham haksatna tampi sung panin lungkiat lohna pen gualzawh nading kal masa hi pah hi.

Lungsim takpi tawh amah a sam mite Pasian in nungngat ngeilo hi.

Laktohni hong tung zenzen leh (or)na nuntakna hong bei zenzen leh van gam nuam tung dingin na kha muang taktak ta hiam?

Khazih sungah,
David Tuang