Tho in la na Pasian sam in!

Tho in la na Pasian sam in!

Jonah 1;6 ‘Ihmupa aw, bang na cih na a hi hiam? Tho in la na Pasian khiang ah thu ngen in!’.

Kamsang Jonah pen Pasian in Nineveh khua pi ah a pai ding a sawl lai tak Pasian thu mang lo in, Tarshish khua lam ah tai sim hi. A tuang na tembaw pi huihpi nung in, a tembaw nasem te lung hi mawh lai tak, a man khua phawk lo-in, nuam tak in a ihmu hi. Tembaw ukpa in mu in, tho in la na Pasian khaing ah kiko in, hong hon thei kha ding hi ci in a sawl hi.

Malaysia Zomi te’ kampau a kizang mahmah/popular khat a hi ‘ka vai uh sah mahmah hi’ hong kicih leh bel na ki ho pih pa/nu pen na aw nem thei pen in ho in la heh nem in thunget sak le cin hoih ding hi. ‘Vai sah”cih kammal pen a khiat na dan ah, ‘kamai lam uh hamsa’, ‘kician lo’, ‘thulela tam’ cih na in a tom in ki khia thei a Malaysia Zomi te lak ah, a kizang nuam lo “Kammal” khat hi napi in, zat a kul na a hang hong om thei zel hi. Ahun zui in,Zomi te hong lunghi mawh sak thei Malaysia kumpi thu nei te tung pan hi ta leh UN thu nei te tung pan hi ta leh thulu tuamtuam tawh kiphukha zel hi. Genteh na in, Malaysia gamsung ah gamdang mite’ khutpi meek vai ding, 6P vai, Bio data vai, Operasi cih mah, Muslim leh Buddhist te kilem loh vai, UN min kibang vai cih a kipan Zomi ten thusia lasia in hong ban toto a, ih Zomi te Paunak in “Vai nunung, guah sia in lap” cih tawh ki bang hi.

Tusung teng in, ih tuak khak thu in, ‘Min’ kibang vai mah kilim gen pen in, phone hong sam UN officer te zong ei kiging khol loh lai tak in, “zingcaing hong pai in”, “thai ciang hong pai in” cih bang tawh a mau ut hun hun in hong sam zauzau uh hi. Ei man leh man hun hi lo in amau cih ni, cih hun a kitung a Zum pan lungkham sa in a ciah khia Zomi tampi tak ki om hi.

Hih min kibang, thangthu kibang vai tam gen nawn kei ni. Tua bek hi lo in,Nung kum sung a kihawm 791-13C te bang Asylum seeker card hi pan in, gam thum na tung thei nang Card hi nai lo lai hi. Asylum seeker card a ngah zo lo zong ki-om lai hi. Asylum seeker card pen 2017 ciang refugee card ding in kiciam teh pan ding hi ci sawnsawn hi. Australia 842 vai e? Tua zong kamthu hi, a sau khempeuh in ngah ding cih na hi lo in, hong sam ding a sponsor te a kiciat mahmah leh tel na kingah thei hi pan hi. Tua hi leh gambel a hong kiciam teh khin te maban bang caing tung? Gen thei om tuan lo lai hi, mai lam ah bang thulu tawh Malay kumpi in gambel mite hong lung hi mawk sak lai ding hiam? 1980 pawl kipan in Kawlgam sunga suangman pha om na Phakant, Mogok khua te ah Zomi te suangmanpha to ding in kipai a, a tuah pha te hong ciah pah in, a tuahpha mel lo te tuni dong a teng suak om hi.

Mikhem peuh tuahpha ding cih thu omtuan lo a, tuah sia ih kisak leh zong nung kik ding a hun om lai hi. Tua mah bang in, Malaysia gam ah kum tampi vai kician lo, mailam vai ding bing pipi in a om kha pawl khat ih om hi. Tua te a ding thunget sak ding in, ei Malay gam sung a Zomi te tavuan bek hilo in, Kawlgam, gam tuamtuam a tung khin Zomi pih te vai zong a hihi. Thunget na ah hong phawk un, thuhong nget sak un, maban lah zom thei omlo, innlam lah ciah nuam lo lungkia lungkham tampi tak thunget na ah hong mangngilh kei un. Tembaw ukpa in Jonah khiang a gen mah bang in, Tho in la na Pasain sam in ! Lungkia lungkham in ih om lai bang ih phawk hiam? Kua ih phawk hiam? Bang in hong heh nem thei ding hiam? Topa ih muang le Isaiah 40;31 ah ‘Ahih hangin Topa amaung mite atha uh dimkik ding a, muvanlai bangin kha tawh leengto-in amaute tai napi-un tawllo ding uh a, amaute lam pai na pi-un gim lo ding uh hi.’

Kong it Zomi te Topa ih muang khial kha hiam? Topa’ muvan lai bang in tha hong dim kik ding a, ih tai hang in ih tawl nawn kei ding hi. Lungnuam tawl dam tak in, muvan lai tha tawh gamthum na a leng thei ding in thu kinget sak ni.

Thoin, ih Pasian sam ni!

Kap Cin