Covid-19 update VIII: A theih huai $2.2 Trillion Coronavirus Stimulus Package Bill
Hih Coronavirus stimulus package bill pen H.R 748: “Coronavirus Aid, Relief, and Economic Security Act” or the “CARES Act” kici in sumtang $2.2 Trillion apha bill golpi ahi hi. Hih stimulus package bill pen US te taangthu sungah sumtang (amount) atam pen hi aa, US Senate leh House ten a pass khit zawh ciang President Trump in sign thu in tua bill pen kizang pah hi.
Tua sungaa akihel thu (texts) te zong kikhahkhia pah hi. Tua bill sungah sections 1-6002 dong om aa, tua sung pan ei mipi te theih huai leh i hamphat zaw deuh ding thu pawlkhat hong hawmsawn nuam ing.
~ SEC. 1102. PAYCHECK PROTECTION PROGRAM & SEC. 2301. EMPLOYEE RETENTION CREDIT FOR EMPLOYERS SUBJECT TO CLOSURE DUE TO COVID–19.
Hih bill sungah na sem (employee) mi 500 pan anuai siah anei company (employer) khempeuh ten Employee retention loan (credit) la thei uh aa, company ahon loh sung (akikhak sung) teng nasem (employee) te kha sum (payroll) pia thei dinguh hi.
Tua hi aa ei Zomite sungah Covid-19 hangin nasep hong kikhawlsak (laid off or furlough) I om khak leh i nasepna (employer) te amanlang in contact ding kisam mahmah aa, Unemployment benefit khawng siau kul nai lo phot ding ahi hi. Company nei (employer) ten hih sumbat (loan) pen kumpi te kiang piak kik kul nawnlo hi.
~ SEC. 2201. 2020 RECOVERY REBATES FOR INDIVIDUALS Hih bill pen nasem innkuan te sum piakna (direct payment to individual) ahi hi.
– Kua ten ngah thei ding – 2019 income tax return a bawl (file)) nasem single leh innkuan nei ten ngah ding uh hi (2019 tax return a nei lo ten 2018 aa tawh pia ding uh hi). Adang Seniors (Piteek, Puteek), Galkap lui (Veterans) leh low-income nei ten zong ngah ding uh hi.
– Direct Payment sum piak dan ding:
1) Income tax return pen Single tawh abawl (file) te (People filing individually):
Single aa tax return abawl mi khat in $1200 ta ngah ding uh hi. Kum khat annual income $75,000 pan atungsiah angah te pen dollar khat tung 5% (5 percent of every dollar) ta kiam suk (ahih kei leh $1000 ta ciang $50 ta kiamsuk) dingaa, $99,000 pan atungsiah angah Single ten bangmah ngah nawnlo dinguh hi.
2) Income tax return Nupa tawh abawl te (People filling jointly):
Nupa tawh joint tax return abawl khawm ten nupa khop in $2400 ngah ding uh hi. Ta khat (kum 17 nuai siah) ciang $ 500 ta ngah ding uh hi. Kum khat annual income $150,000 pan atungsiah angah te pen dollar khat tung 5% (5 percent of every dollar) ta kiamsuk dingaa, kum khat $198,000 pan atungsiah angah Nupa ten bangmah ngah nawnlo dinguh hi.
– Gentehna (example): Kumkhat kha sum (annual income) – $12,200 pan $150,000 kikal angahte:
- Ta 1 nei te – $2400+$500 = $2900
- Ta 2 nei te – $2400+$500+$500 = $3400
- Ta 3 nei te – $3900
- Ta 4 nei te – $4400
- Ta 5 nei ta hi leh – $ 4900
Ei ma innkuan ciat in bangzah ta ngah ding cih kituat thei pah ding hi.
3) Income tax return “heads of households” tawh abawl te:
Tax return heads of households tawh abawl ten $1200 leh Ta khat (kum 17 nuai siah) ciang $ 500 ta ngah ding uh hi. Kum khat $112,000 pan atungsiah angah te pen Ta aneih zah tungtawn in kituak in kiam suk suk ding hi. **Hih sum te pen i kha sum san dan tungtawn in direct deposit or check tawh amanlang thei thei in hong kikhak ding hi.
~ SEC. 2102. PANDEMIC UNEMPLOYMENT ASSISTANCE
Hih bill sungah Covid-19 hangaa nasep khawl in state leh federal unemployment benefit ngah lo te aading special aa akipia huhna ahi hi. Tua lak ah self-employed workers leh independent contractors te zong kihel uh hi. Ei Zomite lak ah Sushi sai leh an sai nei te Covid-19 hangaa sai a kikhak ten hih assistance siau thei ding uh ahih manin mi tampi ten kinoptuam mahmah ding hi.
~ SEC. 3513. TEMPORARY RELIEF FOR FEDERAL STUDENT LOAN BORROWERS.
Hih bill sungah Federal Student loans khempeuh i piak zawh nawn kei leh tawm vei sung kikhawl sak thei aa, tua sung teng interest om lo ding hi. I loan lender te kiang phone or lai tawh ki theih sak kul ding hi.
~ SEC. 4022. FORECLOSURE MORATORIUM AND CONSUMER RIGHT TO REQUEST FORBEARANCE
Hih bill sungah Covid-19 hangin inn lei ten mortgage I piak zawh nawn kei leh tawm vei sung (kha 1-3 sung) payment pen kikhawl sak thei ding hi. Ei ma Mortgage lender te kiang phone or lai tawh zaksak kul ding hi.
~ SEC. 4024. TEMPORARY MORATORIUM ON EVICTION FILINGS.
Hih bill sungah Covid-19 hangaa nasep tawp in inn sap i piak zawh kei aa leh i inn sap pen kha 1-4 sung kikhawl sak thei ding hi. Tua sung teng interest leh penalty cih te om thei lo ding hi. I inn nei (landlord) te kiang phone or lai tawh I theih sak kul ding hi.
Hih Coronavirus stimulus package bill hangin US economy zong tampi hong tha san kik zo ding cih kilamen aa, company nei te, nasem te, sangnaupang te, innkuan te leh akua mapeuh in phattuamna ngah ding ahih manin kilungmuang tuam mahmah hi.
Tulai tak ka nasepna Department of Commerce (Federal Government) pan zong hih bill tungtawn in US gam aading na tampi sep thuah zawh ding kilamen mahmah hi. Topan I uk kumpi te leh Makai te tung thupha hong pia hen aa, hih pulnatna pan amanlang pen in i suaktak zawh nang Topan hong huh ta hen. Thomas On Sian Mung (Washington D.C, March 27, 2020)
Comment piaknop aomleh...