“The rule of law” cih kammal ~ Khat Thang

“The rule of law” cih kammal ~ Khat Thang

Tusungteng a popular lua mahmah Aung San tanu nu kammal khat in the “rule of law” cih kammal a hi hi. A hang pen Kawlgam mite in the rule of law cih a khiatna thei samnapi ding uh zui sa het lo lua ahih man ahi hi. The rule of law i cih bang hiam? cih dotna pen US citizen suak sa khempeuh zakzak sa dotna khat ahi ding hi.

1. Mimal kim in thukhun (law) ciampello in zui hamthang ding;

Zogam ci-in ei-le-ei ki-ukna nei nai lo i hih man in, Zomite in i kipawlna tuamtuamte ( biakna/biakna lo) kipawlnate ah thukhun kinei tek sam hi. Ahi zongin Zomi kipawlna a tamzaw in tua thukhun bylaws pen lai-at thei zaw diak makai khat peuh ap in bawl sak maimai hi.

Tua makai kicite in zong minam dangte at sa bylaws teng lumlet in amau kipawlna tawh a kituak theithei ding pum at suk gawp in hoih kisa mahmah in kipsak ding ol sak mahmah thei hi hang. A hi zongin, tua bylaws i neih bangin, Zomite in kizui ngei se lo hi. *Hih pen Zomite in mi i bat lohna sal lungsim ahi hi.*

2. Makaite in ciampello in thukhun (law) bangin gamta ding;

Zomite kipawlna (biakna/biakna lo) te ah makai kicite in thukhun pen amau zuih ding sa kha lo uh hi. Makaite in thukhun a zuih loh uh teh nungzuite in kipawlna muang zo nawn lo uh hi. Tua in Zomite kipawlna tha nem sak semsem in bei sak tawh kizom hi. Tu hun teh gam khangtote ah thukhun zui mi kiciante bek in makai ngah uh hi. Zomite i hih leh thukhun utut a hei zialzialte peuh makai in ki koih gawpgawp in a nungah khau a khit khikhe pawl khat cihcih a diante peuh makipi in kiseh theihi. *Hih pen Zomite in mi i bat lohna sal lungsim ahi hi*

3. Kumpi thuneite in thukhun (law) bang in ciampello in gamta ding;

Golhguk kipiak zaihzaihna Kawlgam ki-ukna ah thukhun bangin a gamta kumpi thuneite pen zakhang thei lo citciat hi. Gam khangtote ah golhguk ne sim kumpi thuneite pen kikhawl sak lianlian hi. Kawlgam kumpi thuneite mittang leh khuak pen $ kyats kici sum tampite in mittaw leh mihai bang sak in thukhun cih bang pawk kha sak man lo zel hi. Hi bang kumpi ki-ukna ah mapang Zomi kumpi thuneite zong sakhi a pi san a no san cih tawh hong kizom tampi ki om hi.

Tuhun Zomite in tangtawng pek a I Pu I Pa te letcip thumaanna leh cihtaknate i khah suak khin ta hi. Makai thunei i hih sem leh thunkhun pen i zahtak kul sem ding kim lai, makai thunei Zomite in thukhun pen nungzuite a ding a kibawl bang bek sa kha zel hi hang. A lian pen i hipial zongin thukhun om bangin a nungta/a gamta lo makai Zomi tampitak i kipawlnate/i biakna pawlpite ah i om kha hiam? *Hih pen Zomite in mi i bat lohna sal lungsim ahi ding hi*

4. Kua mah mimal khat bek zong thukhun (law) tungah thunei om lo ding;

Gam khangto sa makai mipilte in thukhun zahtak uh in thupi ngaihsut tawntunguh hi. Na asep uh teh thukhun tawh kituak maw kituak lo cih pen kidawm uh in amau le amua kisit phapha pial uh hi. Thu neihna kilang lek lua om a sak uh leh “checks and balances” a hih keileh “separation of powers” bawl pah lianlian uh hi. Kawlgam, Zogam, Zomi makai thuneite pen thukhunte tungah om nuam den citciat thei uh hi.

Mi dangte khialhna khat pen thu khen nuam teisam napi a mau makaite khialhna checks kibawl leh za nuam lo mawk uh hi. Zomite kipawlnate ah checks and balances cih pen na lianpi i sep zawh nai loh hang kisin in zat huai mahmah hi. Thukhun bylaws tungah thunei in gup nop tuam paih nop tuam a nei tawntung makai Zomi sungah kitam simsim lai hi. *Hih pen Zomite in mi i bat lohna sal lungsim ahi hi* Khat Thang