Thawn Kham & Zomi Daily tutkhop, holimna

Thawn Kham & Zomi Daily tutkhop, holimna

Tutung “Kum 15 cin’ Tonzang Lawm Malaysia” pawisim in hongzin ahi Zomi Lasiam minthang Thawn Kham tawh kana kimuthei uhhi. Zomi Daily pan amanthei tanu pawlkhat kana kihelthei ngeingai uh a, holimna hunzong saupitak kana neihpihthei uhhi.

Zomi Daily mintawh alim a al ihki nekpih zawhlohdinghang ankuang umkhopna khatveibeek neihpihding cih ka lunggulh mahmahman uh ahihi.

Kotawh kaki muhkhoptheih uhciang in kakimuhna uh ansai ah naduh penpen vaikhakni kacih uhleh “Buhciim” hongvaikhak hi. U Thawn Kham in “Zomi te’n anlim ihsak pen Buhciim leh Aktui cihkhawngmah hilel hilomaw” ci kawmkawm in, amahzong Zogam pan hongzinkhiat asawttawh “Buhciim leh Gatam” khawngmah ana lunggulh giugiauta nahimawk hi.

Thawn Kham pen Zomi sungbek thamloh, Kawlgam Level ah lasiam minthangkhat in hongki theihpih mahmah, ihki saktheihpih mahmah Zomi lasiam khat ahih mahbangin nidang inzong Media tuamtuam ah Interview naki bawlbawl khinzota hi.

U Thawn Kham kiangah akidongsa thute kicing mahmahkhin himahtaleh atuamdiak in ko Zomi Daily pan “Video Interview” kana bawlpihthei uhhi. Media tuamtuam pan Interview akibawl ngeikhinte pen dawnkikna te laitawh simtheih cihciangbek hi a, ahi zongin tutung Zomi Daily pan U Thawn Kham ii Zokam ngiat tawh a dawnkikna, a aw khumngiat zaktheihding leh alim amel muhtheihding ci’n atuamdiak in kong vaihawm uh ahihi.

Hih Interview hongdotsak lasiam Deih Mang (Sower Sisters) leh Video Camera, Editing hongbawlsak Mung Mung (Blessed) te tungahzong lungdamna lianpi ih pulakkawm pahhi.

Tukum sungzong aki hawmkhiading Thawn Kham’ Album thak nih om a, khatpen Zola Album hi-in, adang khatpen Kawlla Album ahihi. “Sinthu Zaaila” Album pen hawmkhiat theihding in Ready ta hi a, Kawlla Album ahi “Myat Yi Et Kyang” pen Vocal lutding kisamlai cihi.

Kawlkhuai pen Sung Tin Par in sakpih a, Shan, Kachin te bawlngeidan in Chorus sungah atuamdiak in Zola leh Khalkha la tawh kihelhsak cihzong U Thawn Kham in honggen hi. Kawlgam sungah Zomi cih hongki teltheihsak semsemding lakhat ahih manin ih ngaklah mahmah hi.

Lakhui tepen Zomi te khatlekhat thakipiakna in Master mah hongki leisak henla, Copy hongki bawlsak ziauziau keileh cihzong U Thawn Kham in Zomibup tungah hong vaikhak phapha hi. Adiakdiak in Kawlgam ah MP3, MP4 aguangnuam aomlehzong Computer saineite’n Master khui tawh hongpai-in, hong thunsak theiding hi’ng na cithei le uh hoihmahmahding cihzong honggen hi.

U Thawn Kham pen ei Zomi sungah lasiam minthangpen khat ahih mahbang in gamdang muntuamtuam ahzong lasading in kisam kawikawi khin hi. 2006 akipan lasading in hih anuai a gamteng ah zinngei khin hi.

• 2006 – India
• 2007 – Malaysia
• 2008 – Germany
• 2009 – Malaysia
• 2010 – USA
• 2011 pen paikhiatna omlo
• 2012 – Malaysia

Malaysia pen tutung tawh 3 vei hongzinna hi a, hihpan aciahkhit ciangin Singapore ah Zomi Nam Ni lasading in pailaiding hi.

U Thawn Kham kiangah tuciangciang la dawng bangzahbang phuakkhin nahiam cih kadot uhciang in dawng 100 val hamtangding cih honggenkik hi. Aphuaksa lakhempeuh lakah Zola sungpan “Zogam Aw” cihmah hongki deihsakpen cihzong honggenthei a, Kawlla sungpanzong “Kyaye Let Taw Tan” kideihpen sa ing cih honggenkhia theihi.

USA azinlai inzong USA aom ih Zomi pihte’n “Zogam aw, ke’n ong taisan keining” mah naci vangvanglai uh cihzong nuikawm in onggenkik hi. Interview bawlna Video pen Part I leh Part II in kikhen a, anih in na etsak unmaw, lungdam! ZomiDaily