Thangpu leh Ciinno – Pu Thangboi

Thangpu leh Ciinno – Pu Thangboi

Khua hong khal ta a, singtehte vul in lopate keumangta hi. Ni sa mahmah a, khuamui kai in mualteng guam teng tuam mang ahih manin khuadak leng gamlapi kimu zo lo hi. Lo hal khawng zong om ahih manin meikhut vuauvuau na mun khawng zong om hi. Vaimim tuh hun lap a logit le mangtom zawh kul ahih manin Thangpu in khuadak manlo liangin na sem hi. Aciah kuan teh lonawl a ciklak ava et leh balngek hokhat napo ahih manin ui sasi tuak bang a, nuamlua ahih manin botpah samsam hi. Inn atun ciangin; “Nu balngek hong pua ing ei” acih leh anu in “Nuam si hang e Bawi; tulai meh haksat tawh tua mah i huan pah kul ve maw” ci hi.

Thangpu pen tangvalno hipan napi apa in lah nusia baih, anu lah damlo sawnsawn ahih manin lokuan singpuak ansuk anhuam innvai lovai khempeuh amah mah akipeikulden hi. Ama’ innvai lovai teng avan ban ah apute’ lo ah va huh thei zel ahih manin apu in it mahmah hi. Anpawi khin in a vaiminte zong khuk tantan hong phata hi. Laivuanna zong hong kitelta a Thangpu in tan 9 ah athumna ngah ahih manin apu le anu lungdam mahmah uh hi. Apu in “Na laizawhna i lungdamna tawh kop in tukum Lawm Annekna ah vok tuuk 5 khat tawh hong aihsak ning ei Thang” acih ciangin Thangpu lawp mahmah hi. Tan 10 kah tading hilai ahih manin omkhong theilo zahdong in lawp hi. Ahizong anu hong damlo tektek a, agei pan khoi ngiatngiat hong kulta mawk ahih manin Thangpu in sangkah nawnloh ding in hong khentat hi.

Tuuk Hun

Phalvak tungin kawlgitte hong ham ngeingai ahih manin Thangpu i mu thei nawnlo a deihtak akhut zanto in akiziat khit teh thokhia hi. Meiilum kai napi guah zulo ahih manin Thangpu in lo honna ah kii kapna ding sailungtang hual dingin hong kithawi hi. Lawh khat tawi-in innka dawn ah hong tu a sailungtang hual ngekngek hi. Akim ah ak pawlkhat anzong in om zaihzaih hi.

A ak-hamham tawh, akhazap a akhuangkhuang tawh, aknote in azui liailiai akpi pawlkhat tawh bang tawh akte buai zeelzuul peuhmah hi. Nisuak khin napi meiikai lai ahih manin etlawm mahmah a tang pimpem hi. Tualaitak in huansak lam pan ak pawlkhat patau in kawkek in hong tai suk ngeingai uh hi. Thangpu zong heh simpian in “Akua hi dihdih ahia leh” cisim khinkhian in alu tawm kangto in a et leh Ciinno na hi mawk hi. Thangpu kilat man peuhmah a, kamka heekhaak sa in en hi. Ciinno in puantual akhuk nuai deuh ciang akhuh akang khat silh hi. Nivang in kap lai ahih manin Ciinno sung pan vangliatna khat apai khia bang phial a, akim akiang teng tang pempam hi. Thangpu in mitkhahlo in en hi.

“Vangtung mite zong hihkan in a etlawm zen tam” cisim khinkhian hi. Ciinno mual akhup dong Thangpu in naklo in en hi. Mual akhup khit teh “Khui” ci’n khuisa hi. A nak in a uih khat za a, anuai a etsukleh akhe tungah ak-ek na bang hi. A khut sung a sailungtang teng zong na zawl gawpmang khin hi. Ciinno tawh aneulai vua Sunday School akah khop lai hun khawng uh Thangpu in hong phawkkik mahmah hi. Kimawlna tuamtuam; ling a kineihna khawng uh, seng a kineihna khawng uh, tui apehkhoplai khawng uh hong phawk mahmah hi. Sianggen leng aneulai pek a kipan Ciinno pen Thangpu in angai khinkhian ahi hi.

Khatvei bang Ciinno leh alawm te’n khua gal ah ansing tom uh a Thangpu zong kuamah in azot loh hang vazui lel hi. Lampi ah Ciinnote’ ui leh uidang khat kipet ahih manin Thangpu in tua uidang pen deih tak asat leh “Ke ngeng ke ngeng” ci’n aham ciangin Ciinno in Thangpu a et lian leh Thangpu in Ciinno a et kituak lian hi. Alawm te’n atheihpih loh uh hang amau gel bel mit tawh kiho khin uh hi. Ciinno’ mit in “Tangval lua” aci tawh kibang sa ahih man in Thangpu zong lungkim mahmah pah a, athate dim in tuani sun an phawk kha nawnlo hi. Tua uite’ tung bang ah a lungdam sim khinkhian peuhmah hi. Khatvei khangnote picnic pai uh hi. Sun an nek laitak Thangpu in Ciinno agal-et leh Ciinno’ khuk tung ah khuangbai khat tulian hi. Thangpu in tua khuangbai pen hithei hileh hingmat in balzan gawp nuam hi. “Hia khuangbai anuu aitam apaa aitam” cikha liang hi. A an bang thalh heel hi.

A neulai thu teng khat khit khat Thangpu in angaih sutsut laitak innsung pan anu in “Thangpu; Thangpu aw” ci’n asapna aw azak teh kiphawk kik vat in deihtak innsung lam zuan in taai veevaa hi. Innsung alut phei teh anu in “Thangpu bang huan na hia?” ci’n adot teh anhuai nailo ahih lam phawk pan hi. Nai a et leh nitak nai 2:00 nasat velval ta mawk ahih man in Thangpu kisuang lua mahmah a, anu’ mai ah khukdin in, “Mangngilh kha ing ei nu” ci hi.

Phalbi Hun

Huih khawng hong nung in agin bang kiza hiauhiau ta a, nitak ciang in thete khawng hong khuang ciaiciai ta ahih manin phalbi atung ding hita hi. Zanvak la khawng kisin ziahziah ta hi. Thangpu zong zanvak la sinna ah akihel nop mahmah hang anu ngaplo tektek ahih manin anu kia inn ah nusia ngamlo hi. Zanvak hun atun taktak teh anu in zanvak ding in sawl cihtak sawl ahih manin amah zong lungnuamlo pipi in pai hi. Zanvakna mihon lak ah Ciinno azon le amit uh kituah kha lian a, Thangpu alungkim mahmah pah hi. Midang kuakua pai hiam cih zong awlmawh selo hi. Ciinno bel apa Ulian khat ahi si tawh nikten puansilh tawh buai hetlo hi.

Boot tuulsangte bulh in, lawngpen asaneel kigak citcet khat teng a, jean puantungsilh khat asilh ban ah angawng ah Zodial khat khimh lai ahih man in etlawm mahmah hi. Thangpu in Ciinno khat vei a etziau pen anungkha sawn Khuado a asanek teng sang in atha dimzaw tawh kibang hi. Zanvakna pan aciahlam un Ciinno tawh akinai thei pen in Thangpu omden hi. Ciinno in zong kilang saklo in Thangpu’ kiang hong zuan simsim hi. Thangpu’ gei atun teh angawng a Zodial awh pen suut khia-in Thangpu pia phei a “Na khua dam in teh hih silh o” ci hi. Thangpu in zong anial phot ding nangawn mangngilh in sangphei pah buatbuat hi. Tua ni a Ciinno’ Zodial asilh pen apu’ puanbu piak pen sang bang in lum sazaw phial hi. Zong namtui vauvau sa hi.

Lungdam bawl maw lungzuan bawl

Ciinno’ Zodial asilh khak ni a kipan Thangpu pen nidang sangin thalawp zaw hi. Innvai lovaite baihtak in vaan ziauziau zo lel hi. Lungdam bawl ni ciangin Ciinno letsong limci mahmah khat piak ding gel hi.

Akikup pih ding sanggam lah neilo, apa lah sikhin, anu lah damlo lua ahih manin apu tawh vai khempeuh kikum den uh hi. Apu’ kiang ah Ciinno angaihna thu leh lungdam bawl letsong apiak nopna thuteng Thangpu in sung hi. Apu in zong “Kawl pai ding hiveng letsong na deih penpen hong gen lecin aive” acih ciang in Thangpu zong nuam mahmah a Ciinno tawh kituak ding khedap hoih mahmah khat vaikhak hi.

Apu in Ciinno letsong apiak ding khedap hoih mahmah khat puak takpi hi. Thangpu in zong tua khedap pen alupna gei ah koih in velvel hi. Nitak khat aletsong piakding kal ngaklah luata hiding hiven Thangpu omkhong thei nawnlo hi. Ui meikang bang in ki peipei hi. Atawpna teh dingkhia in Ciinno te’ inn lam vazuan hi. Ciinnote’ inn ah lah hawh ngamlo ahih manin akawmvang panin ensim hi. Ciinno in lai nasim in amai ah lalcin khat kivak hi. Angawng ah a Zodial mah na ok hi. Amitkha ah akhedap pen Ciinno abulhsak teh etlawm lua mahmah hi. Pai lenlen tangial hi. Thangpu zong alungkimta hiding hiven ciahpah vingveng in ihmu thei pah hi. Zingsang ciang bang in khanghma dep hi.

Lungdam bawl hong tung peetpeet ding hita hi. December 24 ni zan in Thangpu in lungdam bawl ni a apuan silhding teng hoihtak khep in alukham nuai ah koih hi. Puan nawtna neilo ahih man in alukham pen ama’ puannawtna hipah hi. A letsong piakzia ding khawng gelgel ahih manin alungnuam mahmah hi. Zingsang khuazong vaksiang nailo in Thangpu hong thota hi. Tuilum suang in tua tawh hoihtak hong ki pumsil hi. Apuan teng asilh sitset khit teh anu’ kiang ah zuan phei in “Nu” acih leh anu in dawnglo hi. Thum vei asap khit teh dawng tuanlo hi. Amah zong alung nuamlo a, akhut tawh alok leh anu na vot dikdek khin in anuntakna na om nawnlo hi. Thangpu kap thei paklo hi. Apute apite atun teh kap thei pan hi.

Khualzinna

Anu’ vaiteng asian khit sawm teng akhak khiat khit teh apu in Thangpu Zangkong paipih suk hi. Tua pan in sawmkholh loh pi in apu’ vaihawm sakna tawh Thangpu Malaysia tung hi. Mi’ gam mi’ lei ah lungzuan khuangaih kawmkal ah tung ahih man in Thangpu alungzuang mahmah hi. Anu lah phawk Ciinno lah phawk hi. Tua hunlai in akhua vuah phone omnailo ahih man in innlam hopih theihna ding lampi om vetlo hi. Acihna ding theilo ahih manin Thangpu in “Pasian’ deihna a om leh kimu kik samlo ding ih hia maw ! Topa aw Ciinno nakep sak in” cikha heel hi.

Hunte hong pai toto in Thangpu zong Malaysia pau khawng siamta a, tualtel mahmah ta ahih man in nuamsa talel hi. Zomite zong kitun behbeh ta hi. Nikhat Thangpu in Setapak veng a anasepna sai ah meh akan laitak in ei’ pau tawh apau mi honkhat asai vuah hong tu uh hi. “Ka mipihte hiveh e” ci’n a et leh akhuapihte khat zong kihel amuh ciang in omthei nawnlo in delh phei hi. Kiging khollopi ahih man in “Ciinno adam hia?” cikha pah mawk hi. Akhuapihpa in zong amau’ ki vangngaihnate uh theihpih lo ahih man in, “Dam peuhmah ei ta thum bang neita deep ei” cita lailai ahih man in Thangpu akhuk zawvat in tuksuk dektak hi.

Gam Thumna Ah…

Khuahunte hong kikhel toto in Kawlgam mite gam thumna paitheihna ding lampi hong kihong hi. Thangpu zong UN card angah ciang in “Bangbang hi leh Ciinno lah om nawnlo a hih teh zi neih kul” ci’n ZCF Canaan pawlpi a apahtak sim khinkhian Zomi numei khat heel pah samsam in kiteng uh hi. America atun zawh uh asawt loin tapa khat nei uh a, amin Piangpi hi. Sushi asep leh lawhcing mahmah ahih manin asawt loin inn le lo hong nei zihziah pah hi. A tapa zong sanghoih mahmah ah kahsak hi. A tapa damdam in Zopau in hong pau nawnlo mawk ahih man in Thangpu alung nuam phalo hi. Aizong apilna ding deihsak ahih man in tai selo hi. Piangpi university ah final year atun ciang in apa Zopau tawh hong hopih kik ahih manin Thangpu in lamdang sa mahmah hi. “Nang ei’ pau na theilai sam maw?” acih leh; Piangpi in “Kalai Zopau sinna baih mahmah ta ei pa. No’ hunlai dan hi nawnlo.

Online pan a app te download suk ziau leng app te’ tung pan akisin thei hi ziau. Google ah spelling check sak thei hilai” acih ciang in Thangpu amitte hong gau in lamdang sa mahmah hi. Tua ciangin Piangpi in “Kalawm mangkangte bang Zopau thei tam mahmahta uh ei” cilai hi.Piangpi in “Tuate khempeuh sang lamdang nasak zawk ding khat om lai ei pa” acih leh apa patauh tuak mahmah a, “Bang ahia Piang” ci khiankhian in a aw bang lingpian hi. “Ken lawmnu nei ta” acih ciangin Thangpu in mangmo nei ding a na kituat ahih man in akhut a a sushi tawi bang kiatsuah liang hi.Tua ciang in Piangpi in abul abal a damdam in agen ciang in Piangpi’ kingaih pih pen Ciinno tanu ahih lam thei pan hi. Thangpu in lamdang salua ahih man in “Kamang peuh ai hiam aw” ci’n limlangh mai ah vading in abiang bang nuaikha liang hi. Tua pan kileh kik a “Anu’n e facebook zanghlo maw?” ci’n deihtak paukhia leelaa kha hi. Facebook sung ah Ciinno amuh ciang in Thangpu aci linggawp hi. A phone akiatsuah lohna ding in deihtak len hi.

Mopawi

Thangpu leh Ciinno Facebook sung ah aki friend uh hang in kiho ngeilo uh hi. Apan ngam zawsang omlo uh hi. Ciinno in Facebook a hon nak leh Thangpu online maw online lo cih et masakpen in aneih mah bang in Thangpu in zong en den hi. “Online” cih amuh nak uh leh lungnuam tuak mahmah lel uh hi.

Mopi zia ding Thangpu te pata hong kikumta uh hi. Khua ah bang hotel nuampen ding hiam ci’n online pan in apata un veelveel uh hi. Shalom Hotel mah noptuak sapen uh ahih manin tua khaam khol uh a tunmanh ding sumteng zong online pan pia pah uh hi. Pai lam Zangkong ah taam nawnlo in Kawlpi dong lengsuak to ding in vanleng ticket teng online pan bawl khol uh hi. Kawlpi leh khua kikal a zatding mawtaw te a velvel uh teh Zoland Star te’ mawtaw te hoih sapen uh hi. Aizong nikhat $500 cimawk ahih manin Thangpu in tammanh sapian hi.“”Bangbang aizong lamai ni e mataw” cikik hi. Piangpi in “Pa ken ong hawl ning aw” acih leh apa in “Lampi theilo pi in bangci hawl ding; na paingeina lah hilo?” acih leh Piangpi in “GPS tawh e pa. Nang’ omlai dan mah sakha hi teh” ci hi.

Thangpu in “Sumte bang ci puak mah ding i leh” ci toto a, Piangpi in “Pa nang na khempeuh nang’ omlai tawh akibang lai ding saden kha naïve; hih lai a ih zat ih visa card te credit card te Tedim, Tonzang, Cikha dong ah avek in kizangh thei ta hiven” acih ciang in Thangpu amai hong zum pianta a “Na theih na sak mah uh tam e no khangthak te” cipong hi. Apuan silh ding teng uh zong Shalom Hotel atun ni vua apuak ding un Uphill Textile te’ kiang ah vaikhak pah uh hi. Moken van teng Kawlpi pan in US direct in parcel tawh khak ding in gel khol uh hi. Vai teng agel khit lam uh teh Thangpu in anu hong phawk ngeungau hi. “Na pi zong mataw; TB tawh si hita lawmlawm a maw; tubang hi leh si hetlo mah ding hiven maw; hih teng hong muhpih lecin ut sing e maw Nu” ci ngetngut hi.

Piangpi’ nu in, a sushi sai uh ngak loh phamawh ahih man in, inn lam ah mopi in zui theilo hi. Ciinno tawh akikal thu uh Thangpu in azi’ kiang gen ngeilo hi. “Lungdam bawl letsong kapiak khak loh hang tutung pia veve ning” ci’n Thangpu in ngaihsun ahih man in Manolo Blahnik khedap te kop nih Shalom Hotel address tawh vaikhak khol ziau hi. Ciinno te nuta kop khat tuak pia hi. Mopi ni in Thangpu leh Ciinno akam uh tam akiho loh uh hang amit uh tawh thu tampi kigen uh hi. Amittangte sung vuah ki thuumna, ki itna leh lungdamnate tawh kidim hi. Midang te’n atheih loh uh hang Thangpu leh Ciinno te’n amitte uh tawh akihona tungtawn vua atheih gige uh thukhat pen “Ei gel ih kiteen khak loh hang, ih tate kiteng veve aih teh i lungkim lel” cituak uh hi. Hunte apat pan atawp dong internet tungtawnin Piangpi’ nu in zong na en gige a, alungkim mahmah hi. Lungdamna luankhite gial bangin kia ziahziah ta hi. (Apiang takpi thu pawlkhat kibulphuh hi) Lai gelh: Pu Pu Thang (Siamsin Magazine Vol V – 2018)