Thailand gamsung Pattani khuasung ah Bomb nihvei puakkham in mi 51 liam

Thailand gamsung Pattani khuasung ah Bomb nihvei puakkham in mi 51 liam

Southern Thailand aom Supermarket apualam ah tuni Tuesday ni in Car Bomb nasiatak in puakkham a, mi 51 liam cih AFP pan kiza hi. Hih aliamlak ah naupangzong tampi kihel uh a, tukhasung khuasung mipi “Civilian” te ngimin ki bawlsiatna lakah ahuaisiapen hiding ci’n Police te’n genkhia uhhi.

Thai gam ii leitawlam pen Muslim te innteekna hiphadiak a, tuateng ah Muslim leh Budhist biakna kikalzong buaina aomden ahihi.

Tuni apuakkham nihte pen Pattani khuasung aom Supermarket gei ah hi a, nitaklam 2pm hunpawl in apuakkham ahihi.

Officers te genkhiatna ah apuakkham masa pen mawtaw akikoihna Parking aom Motorcycle sungpan in apuakkham cihi. Supermarket sungah vanlei vanzuak in aomte patau in ki thehthanggawp uhhi.

Anihna apuakkham pen Car Bomb akici mawtaw sungpanin apuakkham ahihi.

Aliam pen mi kibehlap toto in, tuciangciang mi 51 phakhinta hi ci’n Deputy National Police Spokesman Krissana Pattanacharoen in genkhia hi. Aliam te lakah mi 4 pen liamngawh phadiak in thuaklah mahmah uhhi.

Amasa Bomb apuakkhap khitciangin ageinai aom Police te’n mipi te ki khinkhiatding hanthawn uh a, tualaitak in anihna Car Bomb apuakkham leuleu ahihi.

Supermarket ii apualam zong Bomb puakkhapna hangin ki leukhiagawp in, vommengmang gawp hi.

Mipi te nekding lei in apaina mun Supermarket ah hihbangin migilo te’n Bomb akoihsese, Bomb asiah sesepen gitlohvai kisa mahmah hi.

Khangno tuailai Youngsters tampitak omding cih theihgige in hihbang munte ah Bomb asukham tepen UN Children’s Agency inzong mawhsak mahmah uhhi.

Naupangno te ii nuntakna pen hihbangin gitloh gamtatding, lauhuaisak gawpding hizenzenlo hi. Hihbang gamtatna pen nak zakdahhuai mahmah hi ci’n UNICEF’s Thailand representative Thomas Davin in genkhia hi.

More: Thai ah pasal panin numei akilaih te galkap tumkhakding patau mahmah

2004 kum akipan hihbangin nisimphial in gitloh gamtatna, Bomb sukkhapna, kikapna tuamtuam te hangin asi pen mihing luang 6800 bang valkhinta cizen hi. Southern Thailand sungah Muslim te tammahmah uh a, hih Muslim te omna limlim pen daihna sangin buaina piangsakzaw tawntung uhhi. ZD Sawltak #zomidaily