Thai gamsung aom Myanmar Refugee mi 93 te ki ciahsak

Thai gamsung aom Myanmar Refugee mi 93 te ki ciahsak

Thailand gamsung ah kumtampi gambel in aomcip Myanmar Refugee innkuan honkhat ki ciahsak hi ci’n UNHCR te’n Tuesday ni in genkhia uhhi. UN refugee agency UNHCR te genkhiatna ah akiciahsak Myanmar Refugee pen akigawm in mi 93 pha hi ci’n genkhia uhhi.

Thai gamsung aom Myanmar Refugee te aciahtheih nadingin Myanmar leh Thailand gamnih kumpi makai te kithukim in aki vaihawmkhawm hi a, akikal ah UNHCR leh Partners tetawh nasemkhawm in aki vaihawm ahihi ci’n UN Agency te’n genkhia hi.

Tua Thai gamsung aom Refugee tepen Myanmar tawh gamgidung Border Camp aom te hi a, akigawm in Camp 5 panin aciahkhia uh ahihi. Group 2 kisuah in Monday ni in Thailand panin gamgi kantanphei uh a, Myanmar gamsung aom amau omnaciat ahi Kayin State leh Kayah State te ah ciahkhiata uh cihi.

Myanmar gamlampan inzong vaidawn vaimuakna Reception Center 2 kibawl in, Myanmar kumpi thunei te’n vaidawnna nei uhhi. Tuapanin amau teennading akhua ciatciat uhah kipuaksuakding cihi.

Tua aciah mi 93 te lakah mi 73 tepen Kachin State aom Myawady, Kyauklonegyi Border Gate tawnin ciahkhia uh a, adang mi 20 tepen Kayah State aom Mese Border Gate tawnin ciahkhia uhhi.

Myawady gamgi tawnin aciahte pen Thai authorities, Myanmar Ambassador to Thailand Myo Myint Than, Kayin State Chief Minister Nan Khin Htwe Myint leh Cabinet members, Local authorities cihte in na dawntuah ngeingai uhhi.

Tuabangin Kayin State sungah Myanmar Refugee aciahkik tepen Myanmar Ministry of Social Welfare, Relief and Resettlement khutnuai aom Disaster Management Department panin panpihna kipia hi.

Innkuan mikhatbek tepen US$73.99 kipia a, innkuan mi 2 aphate pen US$147.98 kipia hi. Innkuan mi 3 tungsiah aphate pen US$221 kipia uhhi.

Tuaban ah mikhat ciangin lamsaap “Travel Expenses” ci’n Myanmar Kyat K1500 ta kipia leh nikhat annek manding ci’n K3000 kipia uhhi. Tuaban ah Refugee aciahte khasim in anekding uh Monthly Allowance K9000 ta kipia uhhi. Tuateng banah innsung vanzak, anhuanbuk vanzat kisam nengneng akigawm in nam 22 ta kipiakbeh uhhi.

Tuamah bangin Kayah State sungah aciahkik Refugee mi 20 tezong antang, sathau, dawnding tuisiang cihte akipan sumtangin zong K2.3 Million val ki hawmsak cih kiza hi.

UNHCR uliante genna ah abeisa sawtpipek akipan Thailand gamsung aom Refugee gambel tepen innlam ciahding lunggulh mahmah uhhi. Thailand ah Camp sungah omcipdet sangin agam uhah ciahkik in, mailam nuntak khuazakziading vaihawm nuamzawta uhhi. South-eastern Myanmar gamsung ahzong gamsung daihna leh kilemna aomzaw semsemding in ki lamen hi ci’n genkhia uhhi.

More: Thai kumpi in agamsung aom Refugee 70,000 te ciahsaksawm ~ ZD

Thailand gamsung aom Myanmar Refugee gambel te abeisa inzong ki ciahsak ngeikhin hi. Abeisa aki ciahsakpen October 2016 kumsung hi a, tuahunlai in Myanmar Refugee akigawm in mi 71 ki ciahsak hi.

2016 kum khitzawh Thailand panin Myanmar Refugee te aki ciahsakkik pen tutunga hikikpan a, akigawm in mi 93 aciahkhia uh ahihi. UNHCR inzong tuabangin aciahsakkhit uhciangin Myanmar gamsung ah aomzia uh encik in galvilzel uh cih Xinhua News pan kiza hi. Sawltak #zomidaily