Thai te’n Kawlgam ah Hospital nasia mahmah 2 lamding

Thai gamsung Private Hospital Group lakah agolpen thumna in aki ciamteh ahi “Thonburi Hospital Group” te’n Kawlgam ah zato nasia mahmah 2 lamding in thukimna neikhin cih Bangkok Post te’n genkhia hi. Thonburi Hospital Group te leh Ga Mone Pwint Company te’n hih zato lamtheih nadingin thukimna suaikai tading uh a, tuakhit ciangin zato innpi lampahding uh cihi.

Thonburi Hospital Group aneipa pen Dr. Boon Vanasin hi a, Thai gamsung bekbek ah zato 22 neikhin hi. Yangon ah US$100 Million bei in zato hoihmahmah, Standard sangmahmah nih lamding in akipanta hi a, Mandalay ahzong zato khat lambeh tohding gelnanei cih kiza hi.

Kawlgam sungah Ga Mone Pwint Company tetawh na semkhawmding uh ahih manin, 40 Percent pen Thonburi Hospital Group hiding a, adang 60 Percent pen Ga Mone Pwint Company khutsung hiding cihi.

Dr. Boon Vanasin in agenkhiatna ah amau Company pen Kawlgam ah Full Operation Hospital in alut masapen hiding cihi. Hih Hospital nihte hangin Kawlgam sungah cidamna Health Care lamsang khantohna tampi piazoding in ki lamen a, tuaban ah Thai gam paisese kullo in zatui hoihnono tawh Kawlgam ah cina te kibawlthei tading ahih manin, mipi te’n tampi noptuam pihding zong ka lamen mahmah hi cihi.

Thonburi Hospital Group te Hospital anih in ki zokhin leh lupna 400 phading cihzong kiza hi.

Kawlgam pan mihau te, sumhau te in natna khatpeuh aneih uhciang in Thai gam ahih keileh Singapore cih gam khangtozaw te ah kibawlding in paipahpah uhhi. Thai gamsung ah gamdang pan cina akilakding in apai atamzaw pen Kawlgam pan ahih manin, Kawlgam ah zato honding a khentat hi ung cimawk hi.

Kawlgam khitciang atamzaw pen Europea leh Arabian Peninsula gamte pan ahihi. ZD Sawltak