Thadahna pan Hauhna Pilna Ah

Papi khat a thadah mahmah hi. A nek dinguh a zi-in Lo kho hi. Bii
innno khat sungah teeng uhhi. Ta 4 bang nei uhhi. A tate neulai lua
ahih manin a tate nekding Buhsih a zi-in mi kiangah ngen zelzel hi. A
pasal na seppen lup leh khua sung vak hilel hi. Lawm huai-in ki
kholhpih hau thei zaw mah lai hi. A zi leh atate annek ding ngaihsunlo
hi. Amah a vakna lam-ah nek ding aomleh ne lel hi. Mi dangte na peuh
sep thalawp zaw mah lai hi.

Ta 4 bang nei hi mahleh a inn uh hoihlo nekding neilo in aom lai tak
in a khuapihte pasal pau ngiapngiap khat deihsakna tawh a inn vuah
hawh hi. Innteek pa Thadahpa kiangah no innkuan nekding neilo mi
kiangah nek ding ngenngen, biakinn lah pai ngeilo, na ta tenzong puan
gina a neihlohpi, mi thadah leh gentheite innkuan nai vevua ci hi.
Innteekpa zong a thangpaailua a zi en phei, a tate en phei leuleu, a
an belte en, a inn kimteng en hi. Amah leh amah gina ki sa lo mahmah
hi.

A laitang na lua ahih manin tua-a ki pan na sep hanciam mahmah
sumzongh zong, biakna zong hahkat takin kum 5 bang lainatna tawh hong
ki phei gawpleh Sikkang innneih, Buhsih leh Aksa ne zo den, a ta te
niikten puansilh hoih neihsak, pilna hanciampih, a pawlpi sungah Sawm
Ah Khat leh sumpi anpaal cihte hanciam pen suak hi. A tawpna ah tate
zong mipil suah khinin amau innkuan pen mi nuamsa leh mipilte innkuan
suak uhhi.

Ih zakzaksa ahi Mawtaw Hoda company neihpa zong hun khat lai-in Mawtaw
company ah na sep a dawpleh a mel et bek in zong a deihloh a ki nawl
khin gawp khat hi aa, tu-in mihau minuamsa suak mawk hi.

Mihingte pen mikhat in hong gensiat gawp, hong neumuh gawpteh laitang
sinlung hong sukha in hanciamna lungtang ki neizo panleh ki lawm hi.
Mite in hong neumuh hong langbawl hong haimuh zenzen leh tua te zong i
Thupha ki honna ding zong hi thei hi. Hong ki gen sese lo in i om
khakleh a dah huai tawh ki bang phial hi.

Na sepna, pilna zonna, lawm leh gual, ki pawlna…cihte ah hong ki
sukgiap ciang, hong neumuh ciang, hong ki haimuh ciang cih bang
tuamtuam na tuahleh ki phuahphatna leh thalakna lamin a la siamte
khangto hi. Hih bang ko siatna a tuah laitak un naa zong sa mahmah
mai thei hi. Khitui bang luangin lungneu in ka um hi. Tua tawh din
khawl ding hilo aa, ee…khaih kei zong bang hituan mihing ciatciat
ci-in hanciamna lamin i laksiam manun a nuntakna uh a hoihlam in ki
khel hi. Ih thulu, “A hoihlam-ah ki heina”, cihdan hileh a hizaw ding
tawh ki bang ee.