Kumpinu mothak – Rachel Meghan

Kumpinu mothak – Rachel Meghan

Rachel Meghan Markle pen August 4, 1981 kumin Los Angeles, California USA ah piangin, A pianna Nu Doria Regland pen social worker leh yoga instructor sem in Windsor Hills California ah teng hi. A pianna pa Thomas Markle Sr. pen film industry sem mi Emmy Award 2 ngah zo in Rosarito Mexico ah teng hi. A nu pen mivom nam Protestant Biakna zui in, A pa pen Episcopalian (Anglicanism) Biakna zui mi hi a, Meghan kum 6 mi ahih in a nu leh pa na kikhen uh hi, A pianpih sanggam neilo in apa zi masa tate Thomas Markle Jr. leh Samantha Grant te hi.

Meghan pen Hollywood ah khangkhia in kum 11 a phak in USA company lian khat NICK NEWS W/5 kici thulu deihlohna lai-aat in milungsim lawngin na laihsak zo a, bek thamlo in Pi Clinton in zong tua laikhak mu in thapiakna lai na thukpah hi. Protestant Biakna zui in Los Angeles ah sangkah to in 2003 kum in Northwestern University pan double major (theatre leh international studies) tawh bachelor degree ngah hi. Internship in Buenos Aires Embassy Argentina ah semkawm in Madrid, Spain ah a semester zom in pilna na zong ngei hi.

Meghan in international charity ‘One Young World’ ah counsellor sem in 2014 annual summit Dublin ah ‘Gender equality and modern day slavery’ cih thulu zangin thugenna zong nei ngei hi. 2014 kumin Afghanistan leh Spain ah ‘United Service Organization Chairman of the Joint Chiefs of Staff’ zui ngei in 2016 kumin Global Ambassador for ‘World Vision Canada’ za ngah hi. United Nations Entity for Gender Equality and the Empowerment of Women ah Advocate sem a, Leitunga minthang Time magazine in 2018 “100 Most Influential People in the World” sungah na tel uh hi.

Kum 2004 pan 2017 sungin TV shows tuamtuam leh movies ah kihel ngei a, 2014 kumin lifestyle website ‘The Tig’ bawlin numei mithang tuamtuamte profiled om in lawhcing mahmah hinapi April 2017 kumin khawlsak kik hi. Meghan i hauhna US dollar $ 5 million pha dingin ki-um hi.

Meghan pen Actor leh Producer Trevor Engelson tawh kum 2004 in kizui uh a, September 10, 2011 in Ocho Rios, Jamaica ah kitengin August 2013 kumin kikhen kik uh hi.

June 2016 kumin British kumpi innkuan, kumpi zaluah thei ding a 6 na Prince Harry tawh lawmte deihsak le viahawmna tawh 2 vei ki mu (date) khit ciang hong kizui suak uh a, 2017 September kha Invictus Games Toronto Canada pan a khatveina dingin mipi muh in hong kithuah/kilak khia uh hi.

Prince Harry in Zuthawl pia ding cih a teltak ciangin Meghan in a nasep khempeuh khawlsan in, a social media account te zong khak pah hi. Prince Harry in a pi Queen Elizabeth II kiangah thukimna khempeuh a lak khit December 1, 2018 ni-in World Aids Day hun bawlna ah official in mipi ma ah kilak uh a, Meghan zong kumpi innkuan vaite kisin in kizangtoto pah a, March 6, 2018 ni-in Church of England, Archbishop of Canterbury Justin Welby in Kumpi innkuan pawlpi sanna leh tuiphumna na pia hi.

May 19. 2018 ni-in Prince Harry tawh pumkhat suahna nei in tua a kipan British kumpi innkuan suakpah a (Royal Highness), a ma za dingin “Her Royal Highness The Duchess of Sussex” kipia hi. Melbourne Thuthang