US Texas sanginn sungah thaukappa kimankhin, mi 10 si, 10 liam

US Texas sanginn sungah thaukappa kimankhin, mi 10 si, 10 liam

Update: US, Texas State sung aom Santa Fe High School ah pasalno khatin thautawh aphialkap gawpna hangin misi pen 10 ah ki behlapto hi. Misi atamzaw pen sangnaupang vive hi a, thautawipa zong Police te’n mankhiathei uh cih Agencies News pan kizakbeh hi.

Tua thaukappa pen amin Dimitrios Pagourtzis kici a, kum 17 aphakhinkhat ahihi. Amahzong Santa Fe High School mahah sangkah Junior student khat ahihi.

Governor Greg Abbott in agenkhiatna ah tua thaukikapna hangin mi 10 si in, adangzong mi 10 mah liam uh cihi. Texas State sung aom sanginn te ah thaukikapna ahuaisia penpen khatzong hi ci’n genkhia hi.

Thaukappa ii azat thaute pen Shotgun khatleh .38 Revolver khat hi a, tua thaute pen apa ii neihsa hi in, apa’n tua thaute thukhun tawh kituak in Legal takin aneih kici hi.

Thautawipa in amasa in Classroom sungah Pipe Bombs lawnphei masa in, tuakhit ciangin thautawh sangnaupang leh amuhpeuh aphialkapgawp ahihi. Governor in agenkhiatna ah tua thautawipa ii aomna Residence munnih ah zonna kinei in, apuakkhamthei Explosive Device leh CO2 Device, Molotov Cocktail cihtezong kimukhia cihi.

Tua thautawipa in ama Facebook tungahzong “Born to Kill” akici laimal akigelh T-shirt khat khahkhia ngei cihi. Tuabangin mithatding in apiang kahi cih laimal akigelh T-shirt akhahkhiat khitzawh asawtlo in hihbangin agamta ahihi. Amahzong anunung ah amahleh amah ki kaplupsawm a, ahi zongin amahleh amah akithahlupding taktakciangin hangsanlo, ki thatlum ngamlo cimawk hi. Sawltak #zomidaily

Video: President Trump on shooting at Santa Fe High School in Texas: “We grieve for the terrible loss of life and send our support and love to everyone effected by this absolutely horrific attack.” He also says, “My administration is determined to do everything in our power to protect our students, secure our schools and to keep weapons out of the hands of those who pose a threat to themselves and to others.

Abeisa US History ah thaukikapna ahuaisia phadiakteng:

VEGAS CONCERT: 58 KILLED

2017 October khasung in Las Vegas ah thautawi khatin Outdoor Country Music Concert kibawlna ah mi 58 kaplum, aliam bekbekzong mi 550 pha. Amahzong amahleh amah ki thatlum. Hihpen US History sungah “Mass Shooting” misi atampen, ahuaisiapenpen ahihi.

FLORIDA CLUB: 49 KILLED

Jun 12, 2016 ni in Orlando City aom Gay Nightclub ah thautawi pasal khatin mi 49 kaplum. Tua thautawipa zong Police te’n kaplum.

VIRGINIA TECH: 32 KILLED

2007 April khasung in Virginia Tech University ah Korea sangnaupang khatin thautawh sangnaupang tampitak kaplum, anunung ah amahleh amahzong kikaplum. Akigawm in mi 32 si.

SANDY HOOK: 26 KILLED

2012 December khasung in Connecticut, Newtown ah kum 20 aphakhin khatin anu thatlum. Tuakhit ciangin Sandy Hook Elementary School ah sangnaupang tampi kaplum, amahleh amahzong ki thatlum. Akigawm in mi 26 si.

TEXAS CHURCH: 26 KILLED

2017 November khasung in Texas, San Antonio pualam aom Sutherland Springs, Baptist Church ah thautawi khatin Sunday kikhawm mipi te kapgawp, mi 26 takin sihlawh.

TEXAS RESTAURANT: 22 DEAD

1991 October khasung in Texas, Killeen Town ah pasal khatin Restaurant khatah mi 22 thautawh kaplum. Amahleh amahzong ki thatlum.

FLORIDA HIGH SCHOOL: 17 DEAD

2018 February khasung in Florida, Parkland aom Marjory Stoneman Douglas High School pan akihawlkhia sangnaupangkhat thautawh kuankik in mi 17 kaplum.

CALIFORNIA OFFICE PARTY: 14 DEAD

2015 December khasung in San Bernardino ah Christmas Office Party akibawl laitakin Muslim nupakop khatin mi 14 kaplum. Amauzong Police te’n kaplum.

FORT HOOD MILITARY BASE: 13 DEAD

2009 November khasungin Texas, Killeen aom US Army Psychiatrist khatin thautawh mi 13 kaplum, aliamzong mi 42 pha.

NEW YORK IMMIGRANT CENTRE: 13 DEAD

2009 April khasungin New York, Binghamton aom Civic Center ah Vietnamese Immigrant khatin thautawh mi 13 kaplum. Amahzong ki thatlum.

COLUMBINE HIGH: 13 DEAD

1999 April khasungin Colorado, Littleton aom Columbine High School ah naupangno khatin mi 13 kaplum.

WASHINGTON NAVY YARD: 12 DEAD

2013 September khasung in Washington Navy Yard headquarters ah galkaplui khatin mi 12 kaplum, amahleh amahzong kikaplum.

DENVER CINEMA: 12 DEAD

2012 July khasung in Colorado, Aurora aom Movie Theater khatah pasalno khatin mi 12 kaplum. Adangzong mi 70 bang liam. Tuapa pen khantawn thongkiading in thukipia.