USA, Texas sanginn khatah sangnaupang khatin palik khat kaplum

USA, Texas sanginn khatah sangnaupang khatin palik khat kaplum

USA, Texas State sung aom University sanginn khatah palik khat kikaplum cih NBC News pan kiza hi. Lubbock Texas Tech University Campus sungah thupiang hi a, Monday nitaklam in akikaplum ahihi.

Kumpi thunei te genkhiatna ah Monday nitaklam in Campus Police Headquaters ah Police Officer khat kikaplum ahih manin, Texas Tech University Campus sungteng naikhatval ki khakcip hi ci’n genkhia uhhi.

Campus Officer te’n “welfare check” abawlkawm in inndei sungah guihtheih vankham “Drug” pawlkhat mukhia uh ahih manin, tuapan in buaina akipan kici hi.

Tuabang in Drug amuh uhciangin tua Room sung aom sangnaupang khat Campus Officer te’n Police Station ah paipih uhhi ci’n Spokesman khatin genkhia hi.

Tualaitak in tua sangnaupang in thaukhat tawh Police Officer pa alu panin kapsuk a, tua Officer papen sipah hi ci’n Statement ah ki khahkhia hi.

Amah amatsawm Police Officer akaplup khitciangin tua sangnaupang pen khetawh taisuak vingveng hi. Sanginn panin thunei te’n hih thupiang atheihphet in sangnaupang te kidopding, Campus sungah kibuknading zongunla, kikem un ci’n zaksakna Twitter tungtawn in neipah uhhi.

Tua sangnaupang pen amin Hollis A. Daniels kici a, Campus Officer te’n amanlang in zongkhiapah uhhi. Jones AT&T Stadium geinai ah nitaklam 9:30pm hunpawl in mankhia theipah uh ahih manin, Campus sungtengzong khakcip “Lockdown” nawnlo uhhi.

Related: US Texas State sung aom innsung khatah thau kikapna piang, mi 8 si, 2 liam

Lubbock County sheriff’s officials te genkhiatna ah tua sangnaupang Hollis Daniels kicipa pen kum 19 aphakhin khat hi a, San Antonio, Seguin pan ahihi ci’n genkhia uhhi. US gamsung ah thau pen kinopzat mahmah mawk hi. Sawltak #zomidaily