Tedim Sialtang tui Pipe mawtawpi khatin taihkham

Tedim Sialtang tui Pipe mawtawpi khatin taihkham

Danlo Ngeinalo – Jan 12, 2018 (Fri) 12:25 pm hunlaitak in, Lawibual veng, customs (အကောက်ခွန်) zummai-ah mawtawpi pei (6) khat in lamnawl nehlua in, tuiluanna/ hawklam kibawl natung hong tawn zezen a hihman in, sialtang tui pipe hong kisiapah hi.

Pipe a kisiat sak khit uh ciang Sipin zum thuhong zasak lo in, taisuak dildel lel uh hi.

Ek zong i thak khit ciang enkik laisam hi ve hang maw.Sipin zumpan hi bang ngaihsutna picing neilote tawh tangkhatui dawnkhawm ding leh diktak thu bawlding in, thu ki khensat hi.Tui nasem/ Sipin nasemte bek hilo in, Sialtang tuine Tedim khuabup hong thusimlohna hi lel mawk hi.

Hi bang a gamta ngamte pen a dau uh zong paituan khollo ding uh hi. A hunlap in thumna leh genna hong neih kei uh leh thu kibawl hamtang ding hi. Pipe kisia pen 1:00-3:30Pm kikal kibawl hi. Zinciang tui a ngeina bang hong pai zolo kha thei ding hi.

မေရီစတိုး te mataw hi aa, Mawtaw No.6D/2663, a hawlpa Pau Lian ahi hi. Mawtaw in ekleiza dimtak in pua in, kawlpilam manawh in pai hi.

Tui a siasak i om khak leh hehpihna tawh Sipin zum hong ko un ci’n huhna tam veipi hong ki ngenngen aa, tuni ciang dong a ngeimah ngei lai hi. Tuisia leh tuinasemte leh Sipin te vaipuak himah aa ,a hi zong tui pen Tedim khuabup neek ahi hi.

Kei tawh kisai kei kici thei tuanlo mawk hi. A hunlap in kibawl thei leh mipite a ding tui kicing in ki ngah pah ding hi.

Sipin nasem (Staff) te nasep pen tam mahmah hi. Tuilam bek hilo a hihman in nisim/ naisim tui en in, kongzinglak hong ki vakvak zo lo hi. A kisiatna a om leh khauanu/ khuapa te’n zong hong kopah pah un, tua hi leh i tui hunman in hong paizo pah ding hi.

Mipawl khat te lungsim

Pipe leisungah phum buang lo aa, sik pipe beek zang buanglo aa, ci’n thuneite peuh hong mawhsak zawlai ding hi.A hoih ding ki theilo hi lo aa, a hoihpen in kibawl nuam hi.

Hi theih hi leh suai (golden pipe) bang kizang in leisungah ki phumnuam lai hi.Sum leh paai tha leh ngal pilna/ siamna tampi kitaak lah lai i hih ma in, kibawl zo nailo hi. Tui tawh kisai engineer ki tambibel in, ei mau hoihsakdan peuh in thusung giap ngamlel hi hangh.

Zogam pen Christian gam,Zomi te Pasian thupha sang Isareal minamthak te ci’n kipak in,zaila i awiawi hi. I gamtatnate leh i Christian hihna, a ki tuaktakpi mah hiam?

Mivom/ mikang lah in Zomi hihna kipaktak in Zomi hoihna a gen i makaite beek khualna in i lungsim lungngai kik dih ni!

Zomi te i tualniam lungsim mahmah puah phathuai hi.Tua in hong tawisang lo ding aa,gualtung vabang hong tuang sak peuhmah lo ding hi.

Tui Bawlna

Date:Jan 10 2018 (Wed) Lawibual No.(2) sangpi paina lamka Pa. Zendal te inngei-ah pipe mun (2) sia in, No.(5) Middle sanggei ah zong mun(1) sialeu leu hi.

Phalbi Daidam

Phalbi daidam pen mihingte bek in, thualah i sak khak leh nuntakna neilo tui pipete in zong na thuak zo tuanlo uh hi. Phalbi hungsung-ah khuadamlua a hihman in pipete ton velval uh hi.Tua hang in a kipehna (shocket) munte pan tui hong aikhia ahi hi.

Tuni zingsang 9:00Am-4:20 Pm dong Sipin nasemte leh tuilam thunei te in hanciamtak va sem uh aa, kizo thei hi.Thu dang a om kei leh a ngeina bang mah in tui hong pai ding hi. Tedim Municipal