Tedim – Rih – Khuadar: Lampi athak India kumpi’n ziik ding

Tedim – Rih – Khuadar: Lampi athak India kumpi’n ziik ding

“Zogam huam, Tedim leh Rih-Khuadar kikal kizopna lampi athak India kumpi’s vaipuak la in ziik pha ding hi” cih Zogam Vuanzi zum-a lampisai pipa Pa Kyaw Myo Htut in gen hi.

Tedim leh Rih-Khuadar kikal lampi athak ziikna ding lampi dung 3 lak-ah tu-a aki kipsak lampi dung pen Ih gam kumpi in a kipsak khit hi-a, a lamdung paidan ding pen Rih-Bual pan Kapteel tawnin Tedim Palik len-ah suak khia ding hi. Lampi asau na pen Tai 62.4 (100.495km) bang pha dingin kituat aa; lamziik azaina pen khuasung Pi’ 100 hi ding aa, tua lo pen Pi’ 150 hi in, leinen zaina Pi 22.4’ kiim bang pha ding hi cih thu lamsai zumpi pan kiza hi.

Meitei gun kantan ding leiipi (bridge) zong Kapteel leii (bridge) pan Pi 1920’ a gam latna mun ah kilam beh ding hi. Nasep kipat tatak maa in asem ding India kumpi’n 28 March 2018 Ni in ateh avan kipan khin uh aa 2018 sung lampi ziik kipan ding uh hi. Zogam aa’ding in sumbawl sumzuakna lampi lianpen ong suak ding ahih lamzong lampi vaisaipi pa’n gen hi.

More: Rihkhawdar ahzong apuakkham om, numei 3 liam

Tulian laitak aa Tedim leh Rih-khuadar kikal akizang lampi pen Tai 80 val pha aa India-Kawlgam sumbawl paiibawl na-ah kizopna lampi lianpen ahih hangin Maansuang leii in vantampi athuak zawh lohna hangin ahi zongin, a lampi ngiat leitangh lampi hilai ahih manin tuk lam ciang khualzin gamvak a haksakna zong aphual aa om mipi te’n pulaak uh hi. Source: The Voice Myanmar/ Tedim Post