Tedim Post hing kikta

Tedim Post hing kikta

Chin State kumpi thupiakna tawh Tedim khuapi thuneite in “Registration ngah lopi-in Tedim Post hawm thei nawn lo ding…” cih thu October 16, 2014 nimit tawh lai hong piak uh ciangin lamdang kisa leh telsiam hak kisa mahmah a, kumpi thu zuih ding kul ahih manin tua ni akipan Tedim Post a si suak phot hi.

Tedim Post hin kik nadingin kihanciam pah tinten a, Yangon a om Zo Aw media leh ZYA-te hanciampihna tawh tu-in kumpi theihpihna registration kingah ta hi. Regd. No. 00071 ahi hi. Hih munah adiakin Zo Aw Editor ahi Sia Khen Za Sian tungah Tedim Post media min tawh lungdamna kiciamteh hi.

Central kumpi zumpi khat ahi Yangon a om ‘Copy Rights and Registration Office’ pan sum thun ding leh athu ala hong nget khempeuh uh akipiak khit ciangin December 3, 2014 ni-in registration akingah ta ahi hi. Hih ni pen planetshakers-te Tedim hong pai ni uh tawh kituak lian se a, Zomi a tul sawm a simte in khutte lamto in Pasian’ min phat a alam adian ziahziah ni uh ahi hi.

Tedim Post hici zaw deuh leh cih ahi zongin nopna dahna thute hi ta leh theih ding zuih ding thului hoih tuamtuam zong ahun zui-in kisuaksak nuam ahih manin nong puak ciat nading uh kong thum uh hi. Tedim Post in laisim mipite adingin thupha asuah semsem theih nadingin mapang khawm ciat ni, ci-in kong zawn uh hi. Tedim Post