Tedim leh Tonzang khuapi pang khawmding

Tedim – May1
A beisa April 11, 2015 ni-in Tonzang khuapi ah palikte nih in kum cing lo numeino khat abuanna uh tawh kisai-in mipi lam pan bangci pan khop ding, cih tawh kisai mi 20 kim in Tonzang Youth Library ah kamkupna limci khat nuamtakin kinei thei hi, cih thu kiza hi.

Tedim khuapi pan Siamsinte leh ZYA-te kithuahin Tonzang khuapi ah May 1 ni-in mi 5 va pai to uh a, Tonzang khuapi pan Zo Khangno Kipawlna (ZKK), Tonzang Youth Association (TYA), ZYA leh Siamsin Kipawlna – Tonzang cihte in na thu na kuppih uh hi. ZKK in sprite tui lim mahmah tawh meeting kah teng vak pikpek uh a, nitak an pen Tonzang Khristian Youth Fellowship te in vak uh hi, ci hi.

Zing leh thai ah Tedim leh Tonzang khuapi a om kipawlna teng in suai kai a, deihlohna thu leh mipite lungmuan nading hong sepsak ding uh tangko ding geelna kinei hi, ci hi. Tonzang khuazang bup pankhopna tawh numeinonu’ innkuanpihte zong Falam thukhen zum a pai uh kul ding ahih manin khuasung teng huhna kidong a, tam khop mah ngah khin hi, ci hi. Mun dang pan alaina ahuh nuam a om leh kisang ding hi, ci hi.

Kumpi in thukhun tawh kituakin dik takin sem maw sem lo, cih pen mipi lam pan limpha takin ki-encik hi, cih thu kiza hi.

Tedim Post