Tedim leh Tonzang kal Thupiang khat

Papi khat a khe tawh Tonzang panin Tedim lamzuanin pai hi. Tua hun
pen tuk hun guahtui luan hun ahih manin lampi keulo hi. Lamto ah a
paipai leh Tangval khat a Mawtaw Cycle tawh lamto paito zo lo in na om
hi. Papi pa in tangvalpa huh in a mawtaw cycle lamto tengah sawntoh
pih hi. Lamnuam a tunteh tangvalpa lungdam ei ci-in papi pa nusia hi.

Papi pa zong paipai mun khat ah tua tangval pa lamto ah na pai zolo
zel hi. Nih veina bang papi pa in tangvalpa huh in lamnuam a tunteh
tangvalpa in ka Mawtaw Cycle nungah hong tuangin ci tuanlo hi. Lungdam
ei ci-in Pa pipa nusia zel hi. Papi in zong na nungah hong tuang sak
in acihloh hangin tangvalpa cih ding lam-en mahmah hi
Tangvalpa zong amah bek tai valval lel hi. Papi pa zong lampaipai in a
om laitak in Pasal khat in Mawtaw Cycle tawh na pha in, papi pa
kiangah ka nungah hong tuangin ci-in sam hi. Papi zong ut pipi phamawh
kei ci-in nialta leh pasal pa in hong tuangin cici ahih manin atuang
hi.

Papi pa leh pasal khat pa Tedim lam zuanin a taitai vualeh lamto ah
Tangvalpa na pha uh aa, tangval pa in huhna ngenzel hi. Amau zong
phunlo paulo in huh uh hi. A vekpi un Tedim dong lam ton khawmin pai
uh aa, tangvalpa in kei tungah hong tuangin cih kam khat beek paupih
sese lo hi. A vekpi un cidam tak in tung uhhi.

Mihingte nuntakna sungah mi dangte ahuhzo te phunphunlo in huh huhzo
uh ee, huhna a ngenten ngen ngenzo uh ee, mi a panpih ten pai pihpihzo
uh ee. Huhna a ngenten maizumna lah thei kei ee, mi a panpihzo ten lah
a hi bang lianlian gen nuam kei ee.
Huhna icih mihing lampan ih lam-et te tung panin hong pai sangin ih
lam-et loh pipi te tung panin hong pai theizaw hi. Ih nawl khinten
peuh haksatna ih tuahteh hong lainat pih thei gige aa, ih muanten a mu
lo hong ki neih theizaw hi. Ih sim mawh bawl pianten ahih theih zahin
hong panpih theizaw aa, ih pi muhten itna hong neihlo thei zanzan hi.

Hihte khempeuh lak ah itna neihleh mite a panpihnuam dente ut huai
penin khang ki zom thupha khat neih gige uhhi. Huhna a ngen ngente
sangin huhna pia khiazo ki ut ciat na pi in zuih ding haksa ih sa hi.
Piak khiatna, huhna, itna…cihte ih sep nopleh a hun ciang tan omlo
hi. Neih zahzah tawh ki pan khia theilel hi. Itna neih ding pen ki
hanthot theiluat omlo hi. Mimal kimin ei mahmah han ciamna ki sam
penpen hi.