Tedim Khuapi ah (27 Oct 2015)

Tedim Khuapi ah (27 Oct 2015)

TEDIM KHUAPI AH
Thu tawmno khat tawh ka zomi pih teng hih laitawh na dam kim un ci-in hong hopih masa ingh.

TEDIM KHUAPI AH

– Kiteel ding naita ahih man in Tedim khuapi panin khualam zuan in Party makaite mekuang lui dingte me zongin zin khia keei uh a, USDP leh ZCD bang na sia mahmah uh ei. ZCDte bang khualam a zin ding uh teh hi mahmah kei, Motor Cyclete bangin la hong kawm lai, ZCD lan neu suang in zin khia in, nopci zawzen uh. USDP te zong dai om het loin, a pu teng man mah Pajero mawtor tung suangin dungdungdangdang sa keei mai uh.

TEDIMKHUAPI AH

– A beisa sa ni ni-in USDP te in, Kamhau tualpi ah, khua kiim pan mi tampi tak mawtaw tawh kaikhawm in Lukhu Puan eng pawlkhat hawm in thugenna nei uh a, tua ni bang peuhmah Tedim khuasung mi a tamdan, Cycle, mawtaw tamlua himai. ZCD in zong bel Tedim khuapi sungah, Thugenna nei ding cih zong kiza kiaukiau. Tua lo in a vengveng ah zong bel Party kim phial in thugenna bel nei zeuhzeuh in thupi keei sa mai ing. USDP bang peuhmah mekuang lui ding Siavuan Vungh Suan Thang bang bel thupi sa ing, “ka uk hi kei kumpi hong sawl hing,” a cih mah bangin, a thugen a khupna ah cidamna thu tawh khup bilbel, ” ih gam khantoh ding ih deih leh, Lai Siangtho ah ciahkik ni” cih tawh hong zawn lailai ei. USDP hisam keng ee …………………. Den mahmah in Tungzang khua zuan in zolapi te hong kawm sa in mawtaw, mawtaw cycle, tawh ZCD te kithawi khe ngengang hi ven. Tedim Khuapi bel kigamlum keei cih ding himai. Mundang omte bang hong ciah le uhcin bel thupi salua nuteh Tedim khuapi.

TEDIMKHUAPI AH

– Nungkal sungin, CNF zum ah a gin ngaih mahmah khat zankim in kiza, bomb ahi dingin ki ummawh pong hi. Hi tawh kisai pen Tedim ukpi zum ah khuasung mite tawh kamkupna om aa, a paite in ” nidang CNF te hong om ma in Tedim ah hibang a ginngaih kiza ngeilo hi. Tu a tawh a nih veina hin, amau aom hangin zong phattuamna om kei” ci-in khuasung mi a kihelte in Uliante tungah gen uh hi. A maban bel kizom nawn se ding ahia? ……………………..

TEDIMKHUAPI AH

– Palikte omna khang teng lampi kikek zo pian ta uh a, suangtum cian kipan ta uh hi. Hong man hen la a za hong zut lai le uh nopci lua mai ding hi. Tedim khuapi pan sawt vei a zinkhiate bang hong ciah le uh cin bel tawta lua mai nu teh. Na tawta dan ding uh hong gen ning. Lamlamte in khua sung lampi hong behlap in kuultal tawh hong bawl uh a, leivui bel a khuutdan, suntangpi datmei a kisam dekdek hi mai. Tua hin maw, kisam kha zenzen leh, nong ciahteh datmei hoih mahmah khat hong pua hamtang ve…………………………

TEDIMKHUAPI AH

– Tan sang kahte sang khakin hong ciah uh a, a gamla tawh laiphi ( distance) dingte a hih leh laiphi dingin Kalay University zuanzuan ta uh hi. Tua hangin khangno a lui a thak ki phamat keei in khua sung bel nuam mahmah cih ding hi. Akluai phei teng lampi hong hoih piñata ahih manin Mawtaw neute hong lut ta ahih manin hong khuapisak tuam mahmah hi.

TEDIMKHUAPI AH

– Mundang a sum zong leh khuazin aom hita leh sangkah a omte thukhat hong gen pak ning. Tedim khuapi zawzen nak khuapi luata himai, a nei pen thei lian keng. Khapilna nei hin teh. Tedim khuapi sungah maw Sakollam pan Leilum lam na vak nop leh, Line Car om ei. Na sia lua hiven Tedim khuapi. Hih line Car nei te innkuan in a teenna khuapi hong puah mah si ee ci-in ka omna munah ka lung nadam khinkhian hi.

TEDIMKHUAPI AH

– Kumpi Khuado sangkhak ih cih hong tungta a, sang kikhak in naupangte bang sun in khuasungah kimutuam keei hi. Pawlkhat bang singkangkeu tom in gamlak khawngah pai uh a, kumtawmlai bang hong phawk sak mahmah uh ei guai.

TEDIMKHUAPI AH

– A bei a guahtui hang a dongtuakte ahi Kahgen, Then, leh Vongmual khuat pawlkhatte pen Sakollam Sang san khang a tualpi neu ah kituah uh a, a om na dinguh pen Siangsawn lam dingin kigeelsak khin hi. Kumpilam pan a inn dinguh lamsak dinguh a, tua ding zong Kawlpi lam pan innkhuam bul ding Sik khedap tampi tak hong tungto khinta hi. Tuahsiatna pan in Tedim khuapi hong nop cituam ding cih lam in ngaihsun mai ni maw.

TEDIMKHUAPI AH
– Nong ciah baih sawm leh puanlum hong kigingta in maw, khuavot ta hiven.

Lungdam mahmah theih pak teng kong at hi.

Ih omna tekah Pasian in a thupha tawh hong dawntuahtek ta hen maw …..
Tplian
0933395577