Tedim khuapi ah (10 March)

TEDIM KHUAPI AH – Thu tawmno khat tawh ka zomi pih teng hih laitawh na dam kim un ci-in hong hopih masa ingh.

TEDIM KHUAPI AH – EBC khawmpi nuamtak in Pasian hehpihna tawh
kizosiang a, inntek pawlpite bang lungleng in om keei uh a, ahi
zongin, nitak thum kizom in Bawda tual mahah crusade kibawl tawh kizom
ahih manin lunglen dank hat hong phatuam hi. Zo Baptist Association te
kawmpi zong thusia omlo in kizo siang a, sani nitak pen TEDIM KHUAPI
AH a om Revd. Thang Khan Mang (Bass), Sia Langh Khan Khual (Key Bord),
Pa Thang Khen Lian (Lead), leh Tg. Dai Sian Mungte in music tum in
lasa siam pawl khat in zai ziahziah bek uh hi.

TEDIM KHUAPI AH maw guai Pasian thupha tawh meilamte vaihawm ahi.
Meikhuam sing teng sikkhuam tawh kilaih ding hita a, khuasung a
kisapna munte ah phuh dingin hoih khin uh hi. Tua lo gamlak adingte
pen kamhau tualpi ah kikoih zihziah a, kei tumtak in ka lung nadam
khinkhian hi.

TEDIM KHUAPI AH – ih tuinek ding nakkhat kibehlap zong tukha sung in
taigiat kim kizo dinga, a ban pen kizom toto ding ahi hi. Hih tuilak
nasep a sem peh ” Kazai tha” company hi a, tui hong tung leh nuam
mahmah dingin kilam en tek in kingak ngiungeu hi.

TEDIM KHUAPI AH – vengnuai lam lampi pen veng hausa tek in encik in
lampi kikek a, Lawlbual Tuiphum biakinn pan Puchi factory khangciang
pen kultal tui tawh kibawl in nopci cih ding hi.

TEDIM KHUAPI AH – a beisa Feb, 25 ni-in Tedim Theological College in
Sangtuah lukhu nelkai piakna nei uh a, hih hun sungah, TEDIM KHUAPI
adingin a masa pen Doctor piakna hun tawh kithuah hi. Doctor kipia
pen, kuahiam cih leh, a lengnem mahmah, a kamtam khollo, a aw zong a
ngaih auau lo, WCC, ACC khawngah, biakna vai in meeting a vakah zel
MCC ah General tawlkhat sung a sem Cingpikot khua mi Rev. Smith Ngul
Za Thawng hi a, amah pen tulaitak in Part Time in Zangkong ah laihilh
in om hi. Amah pen TTC sang in pahtawina in Doctor of Divinity a piak
uh ahi hi.

TEDIM KHUAPI AH – Tansawm lo tengin sangkhak ta uh a, naupang pawl
khat in khuasungah, Tuikhal a vot kawl pan vaikhak in bell gingsak in
hong zuak uh a, lungnopna hong pia tuam mahmah hi. Tua ban ah, naupang
te in a inn mai vuah, Mohletsawng zuak uh a, a nu a pate uh ahih kei
leh a maingapte kiangah hong leisak un ci-in ngen uh a, beibaih thei
zaw zen uh hi.

TEDIM KHUAPI AH – koi lai pan a hong pai uh hiam thei keng zawngtah
tan in cycle tawh hong kinak pai mahmah a, zawngtah bang kinak ciin
sawm mahmah cih ding hi. Van nengneng zuak in zong cycle mah tawh mun
dang pan hong kipai in, Tedim pen hong gamlum suah mahmah in hong nuam
peuh mah hi.

Thei sunsun a om leh hong at zel ning
tplian