Tedim Khua Zuun Kik Dihni (2) ~ Khup Khan Thang

Tedim Khua Zuun Kik Dihni (2) ~ Khup Khan Thang

Bang hang hiam na cih uh leh, mi khat in inn sangpi a lam nop leh, a ki zawhzawh nading dangka a nei hiam ci-in a masa-in tu-in, a sim phot lo note lakah kua om ahi hiam? Ahih kei leh, a khuam a phuh khit ciangin, inn a zop zawh kei leh, a mu mi khempeuh in “Hih pa in inn lam ding a kipat khit ciangin a zom zo kei hi,”ci-in a mah a ko ding uh hi. Luka 14: 28-30.

Ih Tedim khua pen, eimi khempeuh phialin, itciat, puahnuam ciat , zuunnuam ciat ih hihi. A hizong in, ihsin pilna, ih background, ih trade or career, ih knowledge, ih experiences kibanglo ahih man’ in, ihmuhna, deihdan zong kibanglo hi.

March 16, 2019 in “Ih Tedim Khua Zuunkik Dihni” cih thulu tawh “Tedim Town Municipal Area Boundary” limtak bawl ding thu kong at hi. Etpak theiding anuai ah ko at kik hi.

4. Tedim Town Municipal Area boundary.

Tedim khau pen agol theithei, inn tamm theithei, mitam theithei ding ih hanciam sang’ in, Tedimkhua Municipal in hoih tak a zuun zawh akep zawh ding ciang Town Municipal Area Boundary hoihtak a bawl ding thupi zaw ka sa hi. Tu hun policy pawlkhat in Khuapi suahsak na (Urbanization) ci in hanciam uh hi. A hoihna om, a hoihloh na zong om. Hoihtak aa ih uk zawh ngaplo ding khua ih keek keek ciang in, mizawng veeng (slum neighborhood) hong piang ding aa, hoihlona namkim, Khamthei guihthei zuu leh zatui zahaa zatna, nunei kizuak omna, kitot kiselna tamna cih bang pit-hmuh (Crime) hong khaang semsem ding hi.

Town pen Myo Ing-ga-yat tawh kituak aa ih bawl kul hi. Khua kiim khua te ahi, Sezang, Phaileng, Lamzang, Gawngmual, Lailo, Tuilang, Tualzang, Lailui, Teeklui, Ngennung, Vaalvum khua te tawh ih zop detdat lo ding thupi mahmah ding hi. Tua khua neu teng zong Tedim khua, a eng lo dingin, mei, tui, lampi, sang (Primary School) Zato (Dispensary) Tedim Municipal leh Rural Municipal te in hoihtak ih vansak kul ding hi. Hih khua kiim khua te in, Tedim khua mehgah mehteh, anteh theipuam tawh a supply ding te ahi uhhi.

Hih atom a ka-at lai tawh kisai in, a mai nipi, March 23, 2019 ni, CCJ hall honna ah, ih main speaker sia Mung in, amaa deihdan tawh kituaklo na, hoih a saklona, zan mah deuh in Facebook pan ka sim khak ci-in hong critique pah hi. Amaa muhna zong maankei kacih theih nang om tuanlo hi.

Ama vision in, Tedim khua tu aa zah nih, thum bang in khang ding, inn atam theithei, khua agol theithei in khan (Extend) ding ahi hi. Tua ahih leh atung aa LST bangin, bang teng kisam ding aa, bangteng. bangzah nei ih hiam cih ihsittel phot kul ding hi.

1. Tui (Water)

Hydrogen molecule 2 leh Oxygen molecule 1 kigawmin tui piang hi cih ih thei ciat hi. Leitung ah, akhua uh ah (or) a gam uh ah azattawm ding tui (Water) abawlzo om nailo hi. Sum tam bei lua hi.

1981 kum Tedim tui ding, UNICEF huhna tawh Sialtang tui akilak cil in, population 15,000 (Dimlo, Sezang, Gawngmual, Lailo, leh Teeklui tengzong kihel), population growth rate 1.34% tawh, kum 50 ciangdong 10 gallon per head per day khomding 150 gallon per minute a kila hi. A hizongin kikhomlo hi. Tumaa kum 4/5 lai pawl in, Pawmpi luitui (Gallon bang zah cih thei keng) ki la thuah aa, zong kikhom tuanlo hi. (Why? cih bel kikum dah ni) Tedim khua a’ding tuinak dang om nawnlo hi.

Mipawl khat te in, Zalui tui set tawh hup sak ding ci uh hi. Japan gal lai in 17 Division te in set 3 tuah in Zalui tui 4” G.I pipe tawh Tedim Zato mual ah na lato uhhi. Tu’n tua Zalui tui hupto ding hi leng, initial cost sum koi pan ngah ding, set te running cost, maintenance cost koi pan ngah ding? Tua tui safe drinking water a suah nading, purification, disinfection bawl nading sum tampi bei ding. Tawmvei sung hilo in khantawn ding hipah phot. Tua sumte koipan ngah ding? Tedim khua miteng in, ih annek man’ sang’ tuiman’ tam bei zaw ding hi. Tedim khua azah 3 bang khang leng tui ih bawl tawm zo diam! Zalui tua hup leng, tu mahmah in ih Hydro-power a’ding tui tawm naleei leei, tawm kan’kan’ ding hi. Nipi khatteh mei (Electic) zankhat bang bek kingah pah ding hi.

2. Ekbuk leh Zunbuk, Nin buakna (Sanitation & Waste disposal)

Tulaitak aa ih zat ih ekdum, lamlak aa zuun ih thak ziauziau te, ut na peuh aa nin ihthaang paih ziau dan hong kizang thei nawnlo ding hi. Leinuai ah sewer line, storm (rain water) drainage, cihte hoihtak ihbawl kul ding hi. Sum tampi bei ding. Nin kaikhop nading mawtaw, workers, nin buak nading mun kicing ih nei hiam?. Hihte hoihtak bawl zo kei leng a kilawh thei natna tuamtuam, (Epidemic diseases) hong tam mahmah ding hi. Ihkiim ihpaam hong nin ding. (Environmental pollution) Hoihlona tampi tampi hong kizom to ding hi.

3. Khuaphelep Mei (Electricity)

Tedim khua in, ihzat generator masa pen 1957 kum pawl aa hong tung hi kha ding hi. Tuhun bang aa vanpuakna, kaihna set cih om himawklo aa, generator nuai ah, 2” G.I pipe tom pi 6 sau 4 bang kiphei gualh in, damdam in a ki kai, anungpan kisawn toto hi aa, muhnop peuh mah hi. 25 KW set khat hi aa, tua hun in Tedim in, zan 11PM ciang nisim mei kingah hi. Asawtlo mi kitam semsem aa, meitha zo nawnlo in, ni khat hal cih bangin kingah hi.

1982-3 kum pawl a kipan Zalui Hydro- power hong kibawl leuleu aa, amasa lam teng mei kingah teei napi in, mi kitam semsem aa, tun’ ih thei ciat mah bang in, nikhat hal in mei kingah bek leuleu hi. Maha Dat-aa line (Power Grid line) tuni ciang dong ih lam enen lai hi. ASSK in bel 2019-20 kum in ngah ding hong ci pong ven. An huanna in ih zat ding tawh aki cing diam? Ngah mah leng zong sia Mung cih mah bang in mi/inn azah 3 in khang leng bangtan ih khom tam?. Beltang Hydro-power lah mualmong et bang lai.

4. Ansing, Gas (Firewood, Gas)

Mi mal khantoh zuah (Population explosion) mah bangin, anhuan nang sing zong azah tampi hong kisam to pah ding hi. Ansing koipan ngah ding? Tu mah inzong ih Tedim kiim teng keugaw gam suak ta hi. An huan nang gas ih zang zo diam? Ih Electricity lah meivak ding a zong kicing lo na lailai. Sauvei kikhom (Sustainable) ding ihngaihsut kha ngei hiam? Tedim khua kiim ah singkung omnawnlo ahih man in, ih khuahun zong maannawnlo hi.

5. Sang, Zato, Zatui hawmna, Kangmei zum (School, Hospital, Clinic, Fire Brigade)

Mi atam (Explosion) dungzui in, sangnaupang zong hong khang pah ziahziah ding aa, sang inn ih nei hiam? Zato e leh! Zatui zahaa hawmna e, toto! Inn tam semsem leng kangmei patau om leh bang cih kidal ding? Meiphelh mawtaw bangzah nei? Tui koipan tawi ding?

6 Lampi, Inn kikal lamneu (Road, Alley)

Ih lampi te mi pai nading (Pedestrian), motorcycle, mawtaw pai nading, mawtaw parking ding aom diam? Ambulance, kangphel mawtaw te tai zialzial, kileh ziauziau nang lampi a kicing diam? Lamtung lamnuai kawm ziauziau nading lamneu (Alley) ih bawl zo hiam? Hihte ih ngaihsut kei leh gal leh sa, kangmei patau khat bek om leh ih khuazangbup aa, si maang’ ding, kaangtum thei ding hi. Hih thu te ih lungngai kha hiam? Lusei gal in lamlui omkei leh Kawlpi pan galkap te ahunlap in hong tungzolo ding hi. (Custom mawtaw hawl U Kam Za Pau lu pongna hi.)

8. Human Resources, Police, Manual Workers

Mitam’ dung zui-in, mi kithat, mi kitawng, migilo, mizuauthei, guta buluh, khamtheih zatui zaha zangh, numei pasal kizuak, siatna namkim hong khang ding hi. Slum neighborhood hong piang ding hi. Tue te a kemcing zoding palik (Police) a kicing ih nei zo diam? No Biakna siate in bang programme na nei uh hiam? Inn lam ah lo ih khawhkhawh sang’ Tedim ah pai in, van vagu, mi ipsung vasawk sim sak (Pick pocket) bek leng ih nitha tung zaw ci’n mitampi, khuata pan hong lal ding, gamtat hoihlo hong gamta ding, tua te e ih ngaihsun kha ngei maw?.

9. Sum (Budget)

Hih atung aa ih gente sumlo tawh pianglo ding cileng, sum koipan ngah ding. Kumpi in budget hong suaisak ding maw? Hih atung aa thute hang in “Golhguk” piakna leh nekna hong khang semsem ding hi.

Hih atung aa thu te hoihtak ngaisun lopi aa, thu ih gengen pen, ihmi pi te lamlak khial tawh kibang kasaa hi. Mipite in Pulpit / Stage tungpan thu kigente um pahpah lel thei uhhi. Et kakna; Haka khuapi zong na en le uhcin, huaiham uh, kumpi lampan ngahthei teng ngenngen, lala uh, aswatlo in, mi (Population explosion) tamlua ding. Cost of living hong kahkah ding, kumpi nasemte, sumbuk, sum zongthei mi pawlkhatte bek Haka ah hong teng zo ding. Haka khuapi pen mipi in nusia sia ding, Ghost Town hong suak taktak dinghi. Tui (Water) hong hamsa mahmah ding hi. Tuinak dang neilo uhhi. Timit tui lak zong sum tam bei lua khin hi. Sustainable lo lai hi. Mutpuak mutmut leng a thukzawna limit aval teh’ kitam hi. Tua mah bang ding hi, Tedim zong tua bangmah suaksak nuam ih hi hiam!

Rangoon City pen Revolutionary Council kah maa in, South East Asian ah khuapi hoihpen, minthang pen hi. Pyidawtha planning zui in, Rangoon City Municipal in hoihtak zuunzo hi. Singapore in Rgn City Municipal law zang in tu-in lei tungbup ah a siangtho pen khua ngah ngei hi. Guah tam mahleh zong khuasung tuikhang ngeilo hi. 1962 kum U Ne Win hong khan khitciang in, Rgn Municipal in hoihtak zuun nawnlo aa, N. Okalapah, S. Okalapah, Takitah, N & S Dagon, Dawpong etc.. khua kimteng Rgn City tawh hong kizom in, lawless slum town hong suak hi. Mundang, khuadang gamla pi pek pan zong mi hong kibeh laplap aa, kua zuun zawh ding hinawnlo hi. Ih ngaihsut kak thei nading aa Rgn City thu tawm kong at pong hi.

Thangno
Khupkhan Thang Taithul
Norman, Oklahoma
USA. April 13, 2019