Tedim ICU Building apna kinei

Tedim ICU Building apna kinei

Tedim Zatopi Vaikin Panpih Committee makaihna tawh akilam Tedim ICU Building January 23, 2021 ni zingsang nai 9:30AM hunin Ministry of Health and Sports tungah apna hun kinei hi. Hih hunah Pawlpi tuamtuam pan Pastor te, Amyotha Hluttaw Palai Pu Gin Kam Lian, State Hluttaw Palai Pu Thang Deih Khup, AD Pu Hla Soe, Pu Go Suan Khai (AD Rtrd), Siavuanpipa Dr. Zaw Myint Naing, Khuanu/Khuapate leh Committee teng kihel thei uh hi.

Rev. Dr. Thuam Khan Thang in ICU Building pi sungah thungetna leh apna nei a, tua khitteh Tedim Zatopi Hall ah ICU Building apna hun kizang suak hi.

Siavuanpipa Dr. Zaw Myint Naing in “Hih bang vai lianpi ih sep zawhna pen ki pumkhatna leh itna/veina ih neih man bek hi. Tedim Khuapi ading lungdam huai leh angtang huai mahmah hi.” ci-in gen hi.

Hih ICU Building leh a sung a vanzat khempeuhte gam sung/gam pua pan mipite panpihna tawh April 25, 2020 ni-in lam kipan a, Sum bei zah vekpi gawm MMK 161.5 Million tawh January 1, 2021 ni-in akizo ahi hi.

Tulaitak Oxygen Plant & Filling System koih nading inn tu kha bei ma zawh dingin akilam laitak hi-in Oxygen Plant set vante zong gamdang pan tembaw tawh Myanmar gamah hong kipua ta ci hi. Hih Oxygen Plant & Filling System kithuah khin leh Kalay lam delh kul nawnlo in Oxygen deih bangin ki thun thei ta ding hi. News : Khai Khai/The Tedim Post Photo : Thaw Thawn/The Tedim Post