Tanu mokhakding akiginglua nupikhat Motor Tyre in denglum
A tanu pen zingciang pasal neiding hita a, alawmpa te inn ah innkuankim in khakhawm liailiaiding cihpen a innkuan un ageelna uh ahihi. Ahi zongin tua amau geelna pen cikmahhun ciangin atangtung loding himawk hi. Amau innhuangsung tektek ah aomlaitak in mawtaw pi khatpanin mawtaw pei Tyre golpikhat kitolkhia in honglengkhia a, tua Tyre in hih nupinu denglumkha citciat sese hi.
Hih thupiang pen Malaysia gamsung Kampung Bakar Bata, Jalan Ayer Tawar-Beruas ah nung Friday ni nitaklam 6:30pm hunin thupiang ahihi. Asi nupinu pen Mariaty Bakar kici minnei khat hi a, kum 58 aphakhin khat ahihi. Amau innhuangsung ah lungmuangtak in ama nasep ngeiteng asep hithiat laitak asi hidihdih mawk hi.
Perak Traffic Investigation and Enforcement Department pan ulian te genna ah tua mawtawpi Heavy Vehicle pen taisuak ahih manin, aki kancian laitak hi ci’n genkhia uhhi.
Asi nupinu luanghawm ahihleh Seri Manjung Hospital ah Post-mortem bawlding, aluang sitcianna bawlding in kipuaksuak hi.
Hih nupinu ii atanu neupen ahi kum 24 aphapan Maisuri Ahmad kicinu ii genna ah tuahun laitak in amahpen innsung ah TV en in ka omlaitak cihi. Anu pen huansung ah pakkhawng tuibuak in, huansung hahin aom cihi.
Tualeh apualam ah agin ngaihmahmahkhat kazakciang kapusuakpah cihi. Lamet hetlohpi kanu pen huansung kiattungah siluanggawp in atuk kamu ci a, anupen abil langnih panin si tampi luangkhia gawp cihi.
Aveng apam te’nzong anu mawtaw Tyre golpi khatin adenkhak mu uh ci a, tua mawtaw Tyre pen lengsuak in Motorcyle khat anawkkhit ciangin van kizuakna Sundry Shop khat phupheilai cihi.
Tua mawtaw Tyre pen golmahmah, gikmahmah ahih manin Police Lorry tungah akipuaksawm ciangin mi 6 takin zawngkhop mahmah uhhi.
More: A tapa mopawi simding in apai papi khat Bus tuahsia in si
Friday ni thupiang hi a, amau geelna ahihleh azingciang Saturday ni in atanu mopawi nuamtak in bawlkhawm ngeingaiding cih ahihi. A tanu neupen Maisuri Ahmad te nupa zong azingciang asanggamnu te mopawi ah kihelsawmlua, apasal tawh anute innah ahawhlaitak uh ahihi. Tua atanu mo kikhakna ah apianna anu aki helngei nawnding hilomawk hi. “Mihing leh Papo” ZD Sawltak #zomidaily
Comment piaknop aomleh...