Tangkhat tawh vasa 3 kapsawm

Tangkhat tawh vasa 3 kapsawm

UN OCHA in Rohingya kici Bengali galtaite tawh kisai report apiakna ah hih galtai gentuak refugeete tukum sung a nuntak theihna ding in tuukhun tunma in USD 951 million kisam hi ci in gen a huhna ngen kawikawi uh hi.

Kuama’ phawkma in Kawl galkapte’n ana bawlsia kha ahi phial zong in tunai lam ciang international attention leh thusaina lutgawp ahihman in bawlsia thei lai ding upmawh huai nawnlo hi. Ahi zong in nakpi tak bawlsiat thu aki nak thehthang hun leh tuakhit hun sung in “galtai mi ong khangkhang leh tul 800 ciang bang phathei mawk ding hi” ci a a kigen pen tutak ciang million 1 pan 1.3 million bang phathei ding in genbeh sawnsawn hi. Tul 500 ( half a million refugees ) koipan ong pai hiding hiam? Rakhine gam Maungdaw kim ah mihing tuazah a omna ding khua lian omlo hi.

Hihte phakvak ding leh inn le lo guat ding paulap in gamdang huhna USD 1 Billion dektak a ngen a awng awng uh ahi hi. Bangladesh gambup milip million 160 val ading a kum khat budget pen USD 55 Billion val deuh hi a, mi million 1 ading a huhna anget uh 1 Billion i cih budget buppi i 2% dektak khawng ahi hi. Nuihzak huai simsim hi. Hihbang tawh huhna sum mawkngah miumiau thei ding ahihman in Bangladesh kumpi in zong thakhat thu a a sawlkhia nuam taktak uh hihtuaklo lailai hi. (Vasa 1na)

Kawlgam kumpi in ong ciahkik nuam peuhmah ong ciahkik hen ci a, limtak sittel na neihkhit ciang sangkik bek thamlo inn le lo nangawn vaihawm sak ding in geel uh hi. Ahi zong in Kawlgam ateng hihna proof lahkul a, khat pan ARSA tawh kipawl lo hihna lah kul hi.

Tuabang a kisap ciang ong lutkik ding a qualify mi tam hetlo hihtuak hi. Tua kawmkal ah amau mahmah in zong gamdang khat ah resettle ding, gam 3na cihkhat utzaw sawnsawn uh hi. A khangto sa gam ah … cih vasa 2na kap sawm uh ahi hi.

Hihte pen tu le tu a ngah ding, man’nek ding cihte hi a, hihte ban ah a thupi penpen khat, a vasa golpen, basa 3na in, Rakhine gam eukhia in ” Rohingya kici Bangladeshi territory tuamneih a, a mau ut bangbang a ki-uk ding” cih deih ngetna ahi hi. Tu le tu a angah pah kei zong un, meima anei leh a nungzuih, a phutphut kawm un Bangladesh in Rakhine/Kawlgam ah gam a keeksawm hi a, tua ding a leitung bup thukimpihna ngahna ding lampi a zongzong, a sialsial ahi hi.

Vasa khatna leh nihna bel thumna tawh tehna in thuneu zaw leh thupi lua khollo suak hi. Vasa 3na bel Kawl kumpi in ong bangci dal mawk diam maw… vai sah ei. Khuak zatzek kisam inteh. Pau Khat Suan