Syria Rebels te’n Aleppo leilu-nisuahna khempeuh khahsuahta

Syria Rebels te’n Aleppo leilu-nisuahna khempeuh khahsuahta

Nov. 29, 2016: Syria leh Hezbollah galkapte kipawlin tung lam panin Russiate huhna tawh rebels ten a ukna Aleppo nisuahna lam northern neighbourhoods kicihna mun khempeuh zan in la ta uh a, hih pen Syria leh a pawlte ading gualzawhna lian pen pawl leh rebelste supna lian pen hi kici liang hi. Hih Aleppo nisuahna-leilu lam pen rebels ten 2012 panin a uk uh hi a, hih mun khahsuah ta uh ahih manin Aleppo nisuahna lam teng a khahsuahna ding uh nam hiaihiai ta hi kici uh hi. September 2015 panin Russia in Syria kumpi a huh khit nung rebels ten gam lianpi khahsuah ta uh hi.

Zan-a Syria galkapte leh a pawlte lakna pen Syria rebels kicite sunga kihel rebels kici pawltuamte leh jihadist a kici Fateh al-Sham-te’ ukna Sakhur, Haydariya leh Sheikh Khodr district-te hi a, Kurdish rebels (fighters) ten zong rebelste khut panin Sheikh Fares laksak uh hi ci-in Syrian Observatory for Human Rights (SOHR) director Rami Abdel Rahman in gen a, 2012 panin rebelste guallelhna nasia pen hi lai hi ci-in gen beh hi.Tu-in north-east Aleppo khempeuh Syria kumpi khutah om ta hi.

SOHR in Nipini in Aleppo nisuahna panin khua sung mite 10,000 galtai uh a, mi 6,000te Kurdishte’ ukna Sheikh Maqsud ah tai uh a, mi 4,000te kumpi ukna Aleppo nitumna lamah tai uh hi ci hi. State television in bus dum in rebels kipiakhiate (surrendered) leh nautang mite kumpi in Aleppo nitumna lamah a puakna uh suaksak hi. Kurdish rebelste Syria kumpi leh rebelste tawh kipawl loin daang om (neutral) uh a, ahih hangin Syria kumpi langpang (opposition) ten bel Aleppo lakna dingin Syria kumpi tawh kipawl hi ci-in ngawh hi.

Kumpi ukna Aleppo nitumna lam ah mi 1.2 million teeng a, rebelste ukna Aleppo nitumna lam pen mi 2,50,000 kiim teenna ahi hi. April-May 2011 in Aleppo ah kumpi deih lo a kiphinna na piang a, kumpi in bengdai pah hi. July 20, 2012 in Syria galkapte leh Free Syrian Army (FSA – galkap pan-a taikhia leh thau tawite- tu-in rebels kicite lak-a kihel)-te nasia takin na kikaptuah uh hi. August 2015 in Syria galkap ten thaupi leh vanleng zangin nipi kal nih sung rebelste a kap khit ciangun Christiante teenna mun teng la zo kik hi. Tua khit a kipanin kumpi ukna nitumna lam leh rebelste ukna nisuahna taangtang leh tahum in bangin hong kikhen hi.

More: Pope Francis leh AirAsia neipa Tony Fernandes te kimu khawmding

Sept. 30, 2015 in Russia in Syria kumpi huh hong kipan a, Syria galkapte leh Hezbollahte tawh kipawl in Feb. 1, 2016 panin Aleppo province sungah rebelste kap kipan uh hi. July 17, 2016 in Syria galkap ten Aleppo nisuahna lam-a huhna van puaklutna lampi teng khakcipsak in umcih uh hi. Sept. 22 in Ceasefire kipalsatna hangin Aleppo bup lakna dingin Syria galkap leh a pawl ten galdona pan kik uh a, US makaih in nitumna lam gam rebels gum ten Syria leh Russia in human rights palsak hi ci-in naungek kap na bang ngeingai uh ahih manin galdona kikhawlsan mun mahmah hi. Source: AFP/The Hindu/Al Jazeera and Agencies/ Thang Khan Lian