Sweden ah mawtaw khatin mipi phialnawkgawp in 3 sikhin, tampi liam

Sweden ah mawtaw khatin mipi phialnawkgawp in 3 sikhin, tampi liam

Sweden, Stockholm khuasung aom lamzikpitung khatah Truck mawtawpi khatin mihon omna nawkphialgawp ahih manin atawmpen mi 3 peuhmah sikhinding cih AFP leh Agencies pan kiza hi. Tua mawtaw pen Beer bung puakna “Beer Truck” golpi khat hi a, Central Stockholm aom Department Store pualam ah mipi aphial nawkgawp ahihi.

Swedish Prime Minister Stefan Lofven in hih gamtatna pen gitloh sinkhel patauhsak gamtatna “Act of Terror” hi ci’n genkhia hi. Sweden Police te pulakna ah atawmpen mi 3 sikhin ci uh a, aliamzong pawlkhat om cih kiza hi.

Sweden gampen hongkido, hongki bawlsia hi. Government inzong athaneihzah tawh septheih khempeuh kisemding a, banghanghiam cih ki kankhiading hi. Tulaitak khuasung mipi te nakidawm unla, Police Broadcasts limtak na ngai un ci’n Prime Minister in genkhia hi.

Swedish Police te’n Beer Truck ahawlzel taktakpa pen kithuzakhin uh a, ahi zongin hih tuahsiatna apianlaitak in ahawlpen kimanzo nailo hi ci’n genkhia uhhi.

Swedish broadcaster SVT te genkhiatna ah thau kikap agingzong kiza a, mipi te aphual panin taikhia ngeingai uhhi ci’n pulakkhia uhhi. Stockholm police te’nzong Department Store geinai ah thau kikap om cih zaksakna ka ngah uh ci’n genkhia a, ahi zongin bangvai tawh kuan thaukap cihpen ki theician nailo hi.

Hih tuahsiatna apianhun pen 1300 GMT hun hi a, Stockholm khuapisung aom khetawh khuasungvak atam mahmahna leh Shopping Street, Pedestrian Street minthang mahmah munkhat ah hihbangin Truck mawtaw golpi tawh akiphial nawkgawp ahihi.

Swedish Government Offices tezong hih buaina hangin kikhakcippah in, Ministers tezong kuamah aliam abai omlo cihi.

Beer Company te ahi “Swedish brewery company Spendrups” te’n a mawtaw pen amau neihsa hi ci’n TT News Agency te tungah genkhia uhhi. Ahi zongin hih Beer Truck pen buaina apianmadeuh in ki suhsak, ki Hijack sak in ci uhhi. Beer Truck ahawlzelpa in Delivery bawlding in van asuahkhiatkhiat laitak in aki Hijack ahihi.

Police te ngetna tawh kizui in National Railway Operator te’nzong Stockholm’ Central Railway Station apaiding meileng te khakcipphot uhhi.

Video etnopleh: Stockholm lorry rams crowds killing several people

Swedish security police te genna ah aliam mi tampi om uh a, tuate tungtawn in thupiangzia kidotsan cihi. Hih ngonggamtatna ah akihel, agamta kuahiam cihpen aki limkankhiat mahmah laitak hi ci’nzong genkhia uhhi.

Europe gamsung ah abeisa kum akipan Truck ahih keileh Car tawh ki phialnawkgawp cihpen kilimzak mahmah hi. Al-Qaeda migilo kipawlna te’n 2010 kumin amau galkap ahih keileh amau nungzui te kiangah galvan dingin Truck mawtaw golpi te zang un ci’n vaikhak cimawk hi.

More: London khuasung ah Terror Attack hangin mi 5 si, 40 liam

Nungdiak mahmah, March 22 ni inzong London khuapi laizang ah mawtaw khatin mipi ommuang te phialnawkgawp hi. Westminster Bridge tungpan in anawkphei hi a, khetawh apai Pedestrians mi 4 tak in sihlawh uhhi. Tuakhit ciangin London Policeman khat temta tawh dawtlum in, tuaciangin amahzong thau tawh kikaplum hi. ZD Sawltak #zomidaily