Sunsiah khamlo ~ Hau Za Cin

Khe tawh khual ka zin na uh ciang liangko tungah i puak van zong gik khinzo ahih manin sunsiah kipua zo nawnlo hi. Puak zawhloh thutuam hi in mun pawlkhat ah sunsiah puak ding a lem hetloh hun om hi. Hih ka khualzin hun un ka u numei tawh a tano kum 1 pha ciil tawh ka hih man un naupang lampai zolo pen liangko ah kipua ahih manin sunsiah puak behlap ding hong lem mello hi. Tua manin zing ann nek khit ciang kidingkhia a, sunsiah nek hun ciang tunna khua peuh ah sunsiah kizong tawm ahi hi.

Buh lak khit, phalbi nisa mahmah hita a, zan ciang vot mahmah hi. December kha ahih manin Christmas zong nai mahmahta hi. Ann lak khit ahih manin ann nek ding a kicin mahmah laitak ahi hi. Ahi zongin sunsiah ka kham kei uh hi.

Inntekte in zong hong pia nuamlo hi hetlo, ka nek dinguh hong deihsaklo hi vetlo, hong pia nuamlua, hong nekngaihlua, midang theihloh zong hilo, theih ngei, muh ngei, khua tuampi zong hilo hi. Ahi zongin amau zong ahih theihzah val uh a cihna ding om tuanlo hi. Ka khamloh ding uh a theih uh ciang huan kik ding geel uh a, ahi zongin lampai lai ding ka hih manun kingak manlo ding hi. Amau zong kisuanglah, koh zong lah kisuanglah sem… ahih hang tun ka ngihsut kik ciang, a kisuanglah ding pen koh hilo, amau zong hilo, midang khat na hi gige hi.

Inntekte in zong a bel neih lianpen uh tawh zingann a huan uh hi a, amau zong zin leh leng nei thei den uh ahih manin ann a tam huan dente ahi uh hi. A taktak in a buh bel uh pen a lianzaw, a golzaw khat a neih uh. Ahi zongin kizang thei nawlo ahih manin a neuzaw a zat uh kul a, a thak lah lei kik man nailo uh ahih manin ‘ann khing’ kicinglo ahi hi. Amau khialhna hilo, ko khialhna zong hilo, a dang, a hang khat om hi.

“Ka gil uh vah lel ei, ka masuan uh tungzo peuhmah nung” ka cih uh leh, inntek nu in: “Buh bel golpi ka neih uh himah hiven sangnaupangte in hong dawtvang sak uh a, kizang thei nawnlo akei” hong ci hi. “En ve vua hih bang hi” ciin hong lakhia a, ka et uh leh temta tawh a kisun vang zengzang bel hoih mahmah khat ahi hi. Lamdang sa pian, ahih hang sangnaupang a cih kuate hiam cih bel ka thei kei a, sangnaupang pawlkhat pen kheltat thei mah uh aive cih bek ka lungsim ah ka ngaihsun hi. Tuni dong a deihna ka tel tuan kei hi.

Tua ni in inntek te in a zingbel gol pen uh tawh buh na huan in hileh (zingbel gol pen a sialo na hilai zenleh), koh tua ni a khualzin teng in sunsiah ka khamloh nading uh thu a om hetlo ana hileltak hi.

Tuni in tua inntekte in zingbel gol a lei kik khit ding uh ka lamen a, zin leh leng a deidan vetlo, mi khempeuh a khual mahmah, a it mahmah innkuan ahih man un a zin leh lengte uh gilkial in a ciah ding uh ka um nawn kei hi. Tua ni a amau siamloh hilo, ahanciam uh hang ahi thei vetlo, akici thei vetlo sunsiah kihawmthawh pian hanga lungnuamlo a om innteknu mel ka mitkha ah ka mangngilh thei kei hi.

Hau Za Cin
Phuitong Liim
www.hauzacin.blogspot.com