Suahkhit ciangh nuntakna pumpi, Sihkhit ciangh nuntakna kha

Suahkhit ciangh nuntakna pumpi, Sihkhit ciangh nuntakna kha

1. Unau peeng nih nu’ gilsung pan kihona:
Hey sanggam i suah khitteh nuntakna om lai-in na um hia? Nu a cih na um hiam? Hihte pawl um keng. Kei pen Pasian a cih khawng a um lo pa khat hing. Nang e, nu a cih na mu ngei na leh?

Pasian om kei a ci ten Pasian muh loh bulphuh phuh uh aih cianga naugil sunga naungek kiho nih in zong nu mu thei nai lo ahihna uh tawh nu om lo ci le-uh a maan ding hiam leh cih thu tawh genna hi.

Sih khitteh nuntakna om nawn kenteh, si cih nung sangin kha nuntakna cih khawng om kenteh a ci ten leitung vai ngaihsutna ciang bek bulphuh phuh uh aih cianga naugil sunga naungek suak khia nai lote in zong naugil sung ciang bek ngaihsutna ah suah khit ciang nuntakna om lo ding hi a cih uh pen sih khit cianga nuntakna kha om lo ding hi a cite mah tawh kibang hi ci-a genkakna hi a; a taktakin suah khitteh nuntakna pumpi a kipansan pan ahih mah bangin sih khit ciang zong kha nuntakna a kipansan pan ding ahi hi.

Na nu’ sung pan na suahkhit ciangh nuntakna pumpi pusuak-in, Na pumpi pan na sih khit ciangh nuntakna kha pusuak hi.

A kip a kho upna maw a kikhel khel?

Leitungah thupiangte in Pasian tawh kinai zawk nadingin hong bawl kei leh a leitung mi semsem dingin hong bawl ding hi. 1. Leitung mi pha diakte in mite in bang gen cih bulphuh ding uh a, 2. Pasian’ tate in Jesuh Khrih in bang gen cih hong bulphuh ding hi.

Mite in bang gen cih na bulphuh leh lungnop khamuan om ngei lo ding hi. Banghang hiam cih leh mite gen pen hunzui-in kikhelkhel lel ding hi. Media te thugen a hun zui-in hong kikhelkhel dinga, Politician te thugen zong a hunhunin hong kilaihlaih dinga, scientist (သိပ်ပံပညာရှင်) te thugen zong a hun zui-in hong kikhelkhel lel ding hi – (A hun zui-a kikhelkhel theology- a kip cih bang om lo)

Jesuh Khrih in bang gen cih na bulphuh leh lungnopna le khamuanna na ngah ding hi. Banghang hiam cihleh Jesuh Khrih zanni tuni zingciang kikhel ngei loin kibang ngitnget hi (Heb. 13:8). A kip a kho upna. Evan. Suangh Dal