Son Ngul & Phuung Thuam

Pu Son Ngul-pen Ciimnuai Hausapi hi-a, Tg. Phuung Thuam-pen tagah, thumaan, tangvaal khat ahihi. Amaute-nih holim zeel-a, tuate’ lakpan-in themcik kong’ hawmsawn-hi.

Pu Ngul: Phuung Thuam te-khawng mawk vaakvaak lel-a, bangmah geelna, ngiimna-meel neilo, bangci khantoh ngei mawkding?

Tg. Thuam: Khangto na-cih akoicidaan ahia, Pu Ngul? Ningkum-inbel baangkua kawmzawl nuainung tanbek hiveng-in, tu’n baangkua kawmzawl tungnung tanbang phata veng-e.

Pu Ngul: Ahilo-tata! Khangto cihteh, na lianpipi ngaihsun theiding, geel theiding, seem theiding, cihte-e! Tua na’ tun na-khan zenzen peuhmah agen hi khang-ei.

Tg. Thuam: Pu Ngul, ahihleh nang bang na-geel-a? Kenbel ka’ nu bek-tawh hi-in, “kuan ni-ei” hong cihleh kuan, “tawl-om ni-ei” acihleh tawl-om cihciang longal bangmah theih nei sekei mahveng-e.

Pu Ngul: Tua ahihve kacihcih. Na’ nu om nawnlo hileh apapai na-hi tave! Nanglehnang-a ngaihsuntawm theilo. Kei’ geelna-bel, Pawigaal, Meiteigaal zogawp ding-in, Ciimnuai phungpha sakding cihkhawng ai-ve!

Tg. Thuam: Ka’ nu a-om nawnloh ciang-a keiguak ka-mapan siam nading-a ka’ nu’ thuthu amang-a kinei hiveng. Nang’ cihdaan-a, kei’ khantoh nading-a midang khatpeuh asup/aguallelh sese akuul loding lampi azongzong hiveng-e.

Pu Ngul: Phuung Thuam, na-haii aleh suangthu bat-in taaive! Pawigaal leh Meiteigaal zolopi-in bangci Ciimnuai phungpha theiding?

Tg. Thuam: Pu Ngul, tua ahihleh tua gaalte zogawp lehang Ciimnuai hong phungpha pahding-maw? Tua gaalte-bang azenzen-in a-omlo/abei hileh Ciimnuai phungpha pahding-maw? Akoici daan-a?

Pu Ngul: Na’ thumuhna toiilua mahmah laai-ei. Thu saupipi ngaihsunding, geelding…..

Tg. Thuam: Atua-e, ken muhkholhna neilo kahih ciang-a, Ciimnuai khantoh nading nang’ geelna hongdong hiveng. Pawi leh Meitei ziak-a Ciimnuai aphungpha-lo ahihleh tua gaalte a-omlo hileh Ciimnuai hong koici phungphat theiding cih hive-aw, ka’ theihnop! Tua ahihleh, “phungpha” ding na-cihteh akoici daan-inmaw, Pu Ngul?

Pu Ngul: Haii cihzongmaw, hmmm! Hauding, nuamsading, khangto ding-e, lawmlawmteh!

Tg. Thuam: Tua khangto na-cihliantak hive-aw, ka’ theihnop!

Pu Ngul: Hauding, nuamsading cihte-mah hipah lodia, abangci lawmlawm na-hia?

Tg. Thuam: Lehtua nacih nangbang hau mahmahlel hilo na-maw, Pu Ngul? Sialpi sialtal, bawng, sakol na-nei zihziah lelveleh. Aw, theisimta ing-eih. Keibang-a tagah lubawkte hong hauding cihdaan ahidia?

Pu Ngul: Hmmm. Mawtaw khawng, siikloh siiksakol khawng, leiseek inn lianpipi khawng nei zihziah ding cihna ahikeidia. Nangbel na-hici haiileh hau ngeikei niciai!

Tg. Thuam: Aw, “hau” nacihteh, ahihleh nang hau na-kisa hialeh Pu Ngul?

Pu Ngul: Hau kisa lo-a, agen-gen I-hive!

Tg. Thuam: Abangdia hau kisalo nahia? Hau lecin bangcih sawm na-hia?

Pu Ngul: Mihaii! Hau lehang I’ duhduh ne/dawn, I’ deihdeih neiding ahikeidia? Nang-tawh kiho-pen noksak mahmah veh-aw!

Tg. Thuam: Ha, Pu Ngul, nang na’ duh mahmah, na-neekloh bang om ahia? Seennial sa naduh lehzong hong matsak nuamphial ing-e. Genpong dihve, bang-a, naduhpen?

Pu Ngul: Thebaw Maangpa’ “mehkuang zakhat” acihte-khawng I-lunggulh keidia. No khawngte-in za-zong za-kha ngeilo laaiding hive uhcin.

Tg. Thuam: Za-ngei hetkei mah-ing. Nang tuate na’ lunggulh mawk, ciam-ngei na-maw, Pu Ngul? Lim-amawleh?

Pu Ngul: Bang I-ciam ngeide! Ciam ngeilo-a aciam-nuam hive-hang.

Tg. Thuam: Na’ gengenteh, khantohna-pen neek ngeiloh mehlim mahmah-khawng lunggulh theihna cihdaan hi’ntehmaw? Keibang, ka’ nu-in vaaimiim ciim lak-a akhah maainote uumkeu sung-ah zasan-tawh hong gawisak mahmah limsa ngaungau ing-a, tua na’ cihte atheih-a theilo, lunggulh vetlo kaive. Lunggulh thei zenleng naakgim huai luading aive, kei’a ding-in, naci-na? Khantohna nacihcihbel lunggulh keimai ing-ei, Pu Ngul?

Pu Ngul: …….

T. Zokhai ITNA-IN GUABANG HINNA-HI
60 Narr-Maen Drive
Croydon Hills VIC 3136
Melbourne, AU
Tel: +61 39723 0460
Mob: +61 420 800 560