Somalia gamsung ah kialpi tung ahih manin ninih sungin mi 110 si

Somalia gamsung ah kialpi tung ahih manin ninih sungin mi 110 si

Somalia gamsung ah guahzulo gamkeucip in nekding omvetlo kialpi tungmawk hi. Tuaban ah sungpai natna pawlkhat angahkha omsawnsawn ahih manin ninihsung (48 hours) bekbek in mi 110 in sihlawh cih Reuters pan kiza hi.

Somalia Prime Minister pa in Saturday ni in agenkhiat hi a, adiakin Southern Somalia lamah nekding omlo in hamsa kisa mahmah hi. February khasung in United Nations Children’s Agency UNICEF te’n Somalia gamsung ah guahzulo in khuahun keucipna hangin naupang 270,000 bangin natna tuamtuam thuaklawhding uhhi ci’n genkhia hi.

Nekding neihloh kawmkal ah sungpai natna omsawnsawn ahih manin, hamsa asakpen hunlaitak uh hikhading hi. Nai 48 sung bekbek in mi 110 bang in sihlawhziau uhhi ci’n Prime Minister Hassan Ali Khaire in genkhia hi.

Somali Government inzong aseptheih bangin ahoihpen dingin ki vaihawm dinghi. Leitung muntuamtuam aom Somali te’nzong nekding neilo in apuksi dekdek na mipih te uh hong honkhia un ci’n PM in Statement ah genkhia hi.

2011 kum inzong Somalia gamsung ah kialpi tungngei a, mi 260,000 takin sihlawhmawk hi. Nekding neilo in asi himawh uhhi. Bangzah in khasiat huai, mulkim huaihiam?

Tusungzong nekding neilo in kialpi atun kawmkal ah sungpai natna omsawnsawn. Neding neilo kawmkal ah gilsung aomteng paikhialeh thuakbaih hetlo khading hi. ZD Sawltak #zomidaily