Indonesia Muslim te nekding in akizuak Satay sa em te lakah voksa kihel

Indonesia Muslim te nekding in akizuak Satay sa em te lakah voksa kihel

Indonesia gamsung aom sa hankeu, sa emkeu namkhat ahi Satay azuak khatin sa emkeu sungah voksa koih in Muslim te nekdingin zuaksim cih Jakarta Post pan kiza hi. Muslim tepen voksa anenuam hetlo, akihbawl mahmah te hi uh a, tuate nekding in Port Satay zuakkha ahih manin, hihvai hangin tua Satay Restaurant pen limtak in sitcianna kinei kici hi.

Tua Port Satay akizuakna pen Indonesia, West Sumatra aom Padang City sungah ahihi. Padang Trade Agency panin kumpi thunei te’n tua Satay Restaurant pen sitcianna neipah uh a, tua Satay Restaurant sungah akizuak tepen voksa hitakpi cih mukhia uhhi.

Satay azuakte sungah voksa kihel cihpen Muslim Customer te genlo in, voksa akihmahmah biakna te voksa ane saksak uh himawk ahih manin, Muslim te lungkim hetlo uhhi.

Tua ahih manin, Pork Satay azuakpa pen nung Tuesday ni in kiman khiapah hi. Tua Satay Restaurant sungah zuakding in akibawlsa Satay honkhat leh voksa zong pawlkhat kimukhia hi.

Tua Satay Restaurant aneite genkhiatna ah amauzong tua voksa tepen voksa ahihlam theilo uh a, bawngsa in ngaihsun in azuakzuak uh cisawnsawn hi. Voksa ahihlam katheikei hi, azuakte’n na Restaurant ah hongpuak nung hongci ahih manin, aphual ah leilei kullo in lemtapeuh ci’n ka vaikhak uh hi a, innphual ah hongpuak uh ahihi ci’n Satay Restaurant neite’n genkhia hi.

Hihvai hangin Satay Restaurant anei leh voksa apuak te akigawm in mi 3 kimanin thusitna kineiding cih kiza hi.

More: US Airport ah khualzin khatpa ii vanlak pan voklu emsa kimukhia

Voksa pen sa siangtholo in ngaihsun uh ahih manin, Muslim te’n voksa nekding khamcip uhhi. Indonesia pen Muslim tampitak ateenna hi a, ahi zongin voksa aduh mahmah Chinese te pawlkhatzong omveve ahih manin, voksa pen zonbaih mahmah veve hi.

Malaysia ahzong Bak Kut Teh akici voksa tawh akibawl meh namkhatpen voksa ahihlam theilo in anene pawlkhat om cih kiza ngei hi. Sawltak #zomidaily