Sinlaite Lungsim Puakzia ding ~ Pau Tun Thang

Sinlaite Lungsim Puakzia ding ~ Pau Tun Thang

Mihing te in hihna tuam tuam kinei ciat hi, pawlkhat vanzuak cihbang, pawlkhat pastor cih khong leh laisin (student) cihdan khongin i hihna tuam ciat hi. I hihna tawh kizuia awmdan siam ding pen a kuul leh a kitangsam mah mah khat ahi hi. Pastor zukham neinuai khong kilawm het loin tuamah bangin vanzuak mi khat adingin mihopih siam kisam mah mah hi. Sinlai i hih sungin zong i mawh puakna lian pen laisim ahi hi.

‘Lai’ cih kammal pen eipau in dik mah mah vet vanglak hi. Lai cihtak maha lai tang tang a kuul na hi mawk hi. A lai zo tengin a siam ding hi mawk hi. Lai pen a siam thei deuh leh a siam hak diak ki awm hi. Ahizong in tawma siam thei ten zong sim tang tang kei mawk le uh lawhcing tuan het lo ding uh hi. A siam thei te bek a lawhcing ding hi lo in a kuhkalte a lawhcing ding hi zaw hi. Pasian in mi kuhkalte huh tawntung hi. Gim meel khollo a tawlngak sangin gim mah mah cianga tawlngak a nawpzawk mah bangin, olno taka lawhcinna sangin haksatna tampi kawmkal pana lawhcinna pen manpha zaw sem hi.

Laisin pen pasian’ thuzuih mah tawh kibangin zeetna tampi kiphu kha zel hi. Hong lungke sak thei na a tuam tuam tampi awm hi. Lai sinna hong huh ahi khollo ukna leh lunglutna a tuam tuam ki nei thei hi. Hite pan sinlaite i kidawp siam ding ki tangsam hi. Zu leh khamtheih, gualnopna lam ukluatna etc. te sinlaite’ adingin hoih lo mah mah hi.

Sinlai hih sungin tupna neih ding hoih hi. Tua tupna dungzuiin laisin ding zong teel siam kuul lai hi. Hoih tah ciin mi’ subject lak khat peuh lak pongmawk ding hi lo hi, eima lunglutna pen a thupi pen ahi hi. I lunglutna lam pai kha leng nuam mah mah napi i lunglut lohna khat i hih khak ciang ki cimtak pah hi.

Ama lunglutna nasep a sem kha te mi hampha ahi uh hi. Tupna leh ngimna nei leng tua in lametna hong guan a,tua in hong thalawp sak hi. Sinlai hih sung pen hun hoih khat ahi hi. Bang hang hiam cih leh hun hong pai ding ah mi lawhcing officer lianpi suak lo ding cih kuaman gen khol thei tuan lo hi.

Mi demna lungsim siangtho (Competitive mind) neih hoih hi. Mi lawhcingte haza loa en theih ding hoih hi. Mi demna lungsim nei leeng I va demzo kei phial zongin tua in ei mah ah khantohna tampi hong guan hi. I dinmun ciat pan a masawn sawm ding hoih hi.

Lungsim niamna (Inferiority Complex) neih loh ding. Lungsim niamna in hong thaneem sakin phat tuamna hong pe lohi. Ka sim sim hang thei siam tuan kei ning cihdan lungsim paw lo ding. Mi khat a siam theih leh kei zong bang hang a siam lo tuan di ka hia cih lamsanga ngaihsun zaw ding. Na khat peuh peuh haksat ngaihsut lua lo ding.

Class pai hoih khong, i siam loh teacher te dot ngam khong hoih hi. Mi pawlkhatin exam kuan ciang bekin lai sin ki sawm mawk thei hi. Tua ding hi lo zaw in kum tung pan maha hoih taka sim toh ding ahi hi. Tua hi leh kumtawp ciang thasan luat kuul loin olno takin ki pass thei ding hi. Kum khat sim dinga ki bawl zan khat zan nih thu khonga zawh i sawm leh haksa mah mah kha ding hi.

Hibang din muna i awm khak ciang Exam hall ah gelh ding meelki thei loin kisik huai mah mah thei zel hi. Ahizongin kuamah lah kingawh thei tuan lo hi. Tua ahih manin kumtawp cianga hoih taka i lawhcin theih nadingin kum bul pana hoih taka sim toh ngiat ngiat mah hoih zaw hi. N.Pau Tun Thang (Mumbai, India)