Singlamteh tungah kikhai kei un ~ Hau Za Cin

Singlamteh tungah kikhai kei un ~ Hau Za Cin

1950 kum pawl pan kumsim in a kizang den Jesu sih hun Good Friday ciangin Philipines gama Pampanga kici gamke ah mi tampi in Topa Jesu singlamteh tungah a kikhai bang linlian in khut leh khe singlamteh tungah kilhcip in kikhai uh a, mual dawn ah kikhaikang sak takpi den uh hi.

Tu kum kikhai ding min piasa mi 17 pha khinzo hi. Tuni, Good Friday ni, April 22, 2011 niin kikhai ding uh cihna hi.

Philipines pen Roman Catholic gam ahih mah bangin biakna makai bishop te in tua banga hih nawnlo dingin mipite kham uh hi. Mi hih zong a enlo ding, a phual ah va pai lo dingin tangko uh hi. Hih hun a tun simin khualgam pan mi tampi tua mi kikhaite en ding bekbek in tua gam Pampanga ah pai uh kici hi. A kikhaite ngaihsutna ah, “Jesu thuak bang ka thuak hi” cih lungsim neihna ding leh Jesu thuak nak nat si, haksa si cih a theihna ding uh hi, ci uh hi.

Kumsim in tua kikhaina munpi ah mi tampi paikhawm in ann zuakna, vukkhal zuakna, tui zuakna, cih bangin mi tampi in ni thum sungin sumbawlna hoih mahmah nei man uh hi.

A kilhna ding siktukilh te zukha tawh sawpsiangin tua ciang Christ banga kikhai dingte khutpek leh khepek singlamteh tungah kilhcip in minit 20 bang singtungah kikhai in, tua ciang meima tuamte kiangah paipih uh hi. “Kristos” (“Christ” a kicihna uh, amau leh amau Jesu Christ banga kikhaite a cihna uh) lak ah Ruben Enaje in tukum pen ka 26-veina ding hita hi ci hi. Gamdangmi te in zong hih ngei uh a, tukum bel gamdang pan kuamah in min pialo uh hi.

Khatveivei hih banga biakna tawh kisaia uangtat luatna ah tuahsiatna zong piang ngei a, nung kum in Black Nazarene ci a Jesu lim zawnga lamzuihpihna ah mi nih delh lum hi. Tua banga Jesu lim zawnna ah kamphatna, tuahphatna, ahih kei leh thupha om hi cih um uh hi.

Philipines gama Catholic Bishops Conference in tua banga singlamteh tunga kikhai leh milim zawnga lamzuih cihte hoih asakloh thu uh leh, mipi te kiangah hih nawnlo ding leh a hihte zong thapialo ding, en lo ding, nungngatsan dingin a hilhden uh hi. “Ei leh ei kina tawm saklo a thungetna leh lungsim kipiakna tawh phatna pen phatna cingtaak hikhin zo hi,” ciin Bishop Tirona in gen hi.

Philipines ah mihing 92 million bang om a, tua lakah 98 per cent bang Catholic ahi uh hi. Ahang bel 1898 kum dong Catholic biakna a zui Spanish te in Philipines gam kum zathum (300 years) bang na uk uh hi.

Hih banga singlamteh tungah kikhaina in a kikhaite leh a gei pan a ente natna kilawhsak thei ding hi ciin kumpi lam pan gen uh hi. Banghang hiam cih leh a kikhaite sisan luang kithehzak in a ente tungah tukha thei ding hi. Tua panin natna kilawhtheih ahi ci uh hi. Nang eleh, tua bang om leh a gei pan na va en nuam diam? Hau Za Cin (Phuitong Liim)