Singapore Zolia te dinmun nong theihpihding uh

Singapore Zolia te dinmun nong theihpihding uh

Singapore ah Zolia te dinmun nong theihpih ding uh ka deih hi. Singapore ah sawtpi a om khinsa khat ka hih na tawh hithu tawh kisai tawm hong kamkum nuam ing.

Pasian tapa (God the Son) a hi Topa Zeisu tektek in ateel mi 12 lak ah khat in a na lehhek mah bang in leitung mi te zong a gina lo tam mah mah hi.

Tu a i gen ding Singapore a’ nasem aa om eimi nungakte zong mi gina lo om lua zen kha mah ding hi.

I theih tek ding kong gen nop in ah;

1. Haksatna, sim mawhna tampi bek tham lo bawl siatna nangawn thuak a’ na a sem te uh, panpihna, hanthotna, tha piakna tampi a kisam uh i nungak no te hi uh hi.

2. Mi gina tampi om in a ki phasak mah mah (Singaporean te peen leitung ah mi kiphasak peen te hi ding in ki gen in mi zong a neu et mah mah te uh hi) innteek te uh’n a singkuang tawh nanngawn uh a ap ngam uh dong ciang a gina, a muanhuai a om lam nong theihpih ding uh ka deih hi.

3. Pasian mah a ci tinten in kikhopna te ah pai tan tan in teci a pan uh ciang uh’n tun zo lo dek dek mah ta leh uh Pasian mah a muang in a phat tinten, sehsuah manman in pia in Siate panpih in Pasian nasepna ah a kihel tampi a om lam uh nong theih pih ding uh ka deih hi.

4. “Numei san khat” a hih lel uh hang uh’n pasal a kisa tampi tak te in a hih zawh loh nu le pa inn ding a thak a lam sak tampi om khin a hih lam nong theih pih ding uh ka deih hi.

5. A nu a pa te uh a kisap leh zato kah sak in operation a kisam te bawl sak in a u a nau te uh sang kah sak in, gamdang nangawn ah a kah sak te uh a hih lam uh nong theihpih ding uh ka deih hi.

6. Mangpau pau thei in senpau pau thei uh in, mihau, mi thupi te kiang ah nasem uh a hih mah bang uh’n International level ah a gamtang thei te uh a hih lam nong theih pih ding uh ka deih hi.

7. A off ni uh teh om khong lo in training tuam tuam pai in, sin theih tuam tuam sin in a kikah thei bang bang kah uh aa Certificate tuam tuam a ngah tampi a om lam nong theih pih ding uh ka deih hi.

A tam zaw peen pasal a kisa mah mah tampi sangin a muanhuai zawluate a hih lam uh hong theih pih un la hih bang in zahpih bawlna in, ko bawlna in, mindaisakna in kuamah in nong bawl sak nawn loh na ding uh hong thuum ing.

Telnop, theihnop, kupnop a om leh hong hopih thei uh teh. Eimi te i vek in i biak Topa in Thupha tampi hong pia tek ta hen. Pau Khan Thawn (Singapore, (65) 9025-2671)