Singapore meileng khawlna ah mipi lauthawng nadingin Bag anusiapa kimankhin

Singapore meileng khawlna ah mipi lauthawng nadingin Bag anusiapa kimankhin

Singapore gamsung aom meileng khawlna Hougang MRT Station ah Bag khat anusia pen pasal kum 39 aphakhin khat hi a, Singapore Police te’n mankhinta uhhi. Thusitna akineihna ah hihpa in athong ip pen meileng Station ah anutsiat ngiat kici hi.

Police te’n tua Bag pen Checking abawl uhciangin asungah alauhuai, apuak khamthei cih hiamvan bangmah mulo uhhi. Bag sungah innsung vanzat Household Items pawlkhat om ci’n Singapore Police te’n genkhia uhhi.

TIMELINE OF EVENTS

• 2.40pm: Hougang MRT station ah anei omlo Luggage khat kimu hi.
• 2.45pm: Police te ki zasakpah hi.
• 2.55pm: Meileng thunei SBS Transit te’n North – East Line ah atai meileng te Hougang Station ah khawlsaklo hi. Commuters tezong Station panin ki hemkhiasak uhhi.
• 3.45pm: Station ki khakcip hi.
• 4pm: Bag kihong in, asungah bangmah lauhuai hiamvan omlo, Household Items pawlkhatbek om ci’n Police te’n genkhia uhhi.
• 4.03pm: Police te’n patauh nading omnawnlo ci ahih manin, meileng angei in taisak kik hi.
• 4.35pm: Hih buaina apiangsak kum 39 aphakhin pasal khat palik te’n man uhhi.

Police te’n amatpa uhpen Station sung aom khansung khatah nai 3 sungbang thudotna nei uh a, tuakhit ciangin Police Station ah ciahkhiatpih uhhi.

Singapore gamsung ah ki lauthawngsakna “Security Threat” pen ki Serious lakmahmah ahih manin, hihbangin ngimna taktawh mipi alauthawngsak, Public Alarm abawlte pen kizahloding hi ci’n Singapore Police Force (SPF) te’n genkhia uhhi.

More: Singapore meileng Station khatah muanmawh vankhat kimu in ki patau

Tuaban ah khuasung mipi te’n Personal Belongings, navan khatpeuh uh akem acing omlopi in mawk nutsiat kei un. Tuabang aki nusiakha aomlehzong amanlang in Train Station Staff te ahih keileh Police te hong zasakpah uh ci’n Police te’n Statement ah genkhiatbeh uhhi. ZD Sawltak #zomidaily