Singapore lamzikpi tungah mawtaw 12 tak ki phukhagawp in mi 7 liam

Singapore lamzikpi tungah mawtaw 12 tak ki phukhagawp in mi 7 liam

Singapore gamsung ah tuni (October 06) Friday zingsanglam in mawtaw 12 tak kiphugawp ahih manin, mi 7 in liamlawh uh cih CNA pan kiza hi. Kallang-Paya Lebar Expressway (KPE) kici lamzikpi tungah East Coast Parkway lam zuanin apai laitak atuahsia uh ahihi.

Tampines Road Exit panin apusuah madiak in mawtaw aki phukhagawp hi a, mawtaw akiphukha te lakah Taxi 3 zong kihel hi. Hih tuahsiatna Accident hangin KPE Express lamzikpi tungah mawtaw awkcip zihziah in, Buangkok zuatna lamah 1 Kilometer sungbang mawtaw awkcip zihziah cihi.

Land Transport Authority te’nzong hih Accident aomkhit phetin Twitter tungah zaksakna, tangkona neikhiapah uh a, KPE (towards ECP) ah tuahsiatna om ahih manin tualam nawkkei un ci’n zasak uhhi.

Video: 12 cars involved in chain collision on KPE

Singapore Civil Defence Force te genkhiatna ah tuzingsang 9:45am hunpawl in tuahsiatna om ci’n hongki zasak ci a, tuaciang in cina puakna Ambulance 3 tawh kidelhpah cihi.

Tuahsiatna panin aliam mi 5 tepen Singapore General Hospital ah kipuak a, adang mi 2 tepen Raffles Hospital ah kipuak uhhi.

Related: Malaysia, Serdang vengsung ah mawtaw 6 tak kiphugawp in mi 2 in sihlawh

Hih mawtaw lampi tuahsiatna Accident vaitawh kisai in bangci bangin thupiang kipanhiam cih Police te’n kanciansan uh cih kiza hi. Singapore gamsung mawtaw kiphugawp, kithuapgawp lakah ahuaisia pawl hikhading hi. China gamsung Highway lamzikpi tungahzong nungkumsung in mawtaw 56 tak ki phukhagawp in, mi 17 takin sihlawhngei uhhi. Sawltak #zomidaily