Banghang in lai simhuai ahiam? ~ Job Cinpi

Banghang in lai simhuai ahiam? ~ Job Cinpi

Laisiam ding a kihta mahmah mi khat na hiam? Na kianga om na tu na tate lai simsak nuam mahmahnapi na tu na tate muhna ah laibu khat vei zong a lem ngei lo mi na hih leh na tu na tate na thuhilhna muibun zo pha lo ding hi.

Gamdang mun tuamtuamah Kawlgam mah bangin lai tawh kisai kipattahna a khangto nai lo gam tampi om hi. Lai tawh kisai a khangto nai lo gam tuamtuamte lakah Kawlgam pen a khangto lo pawl hi dingin ka um hi. 2014 kum Kawlgam mimal simna ah Kawlgam sungah mi tan 50 val kiom hi, ci-in kiciamteh hi. Mi tan sawmnga val omna gam khat ah, laibu bu zanga a bei dong zuak ding pen a kum bangin ngak kul hi, ci-in Kawlgam laigilh siapite in na gen uh hi.

A hoih a minthang zaw deihte bu tul khat cih bangin kibawl ngam bek hi, ci uh hi. A khangto gamte ah laigelh siamte hauhlawh uh a, nuntak nuam lawh uh hi. Laigelh siate a hauh nading mipi in a laigelhte uh a mawk leisak hi peuhmah lo uh hi. A hang pen laisimna in khantohna hong neisak hi, cih thei uh ahih manin laigelh siate khantoh nading sangin amau khantoh nading lunggulhna tawh lai a sim ahi zaw uh hi. Laigelh siat in amau angsung ading bek khualna tawh lai a mawk gelh hi lo uh hi.

Zomi Laisim nuamte page sungah ka mun nawh mahmah thu khat om hi. Gentehna, Pasal hoih na suah nop leh, cih thulu tawh thu tawm khat kigelh hi leh tua thu nuai ah Zi hoihte ading zong kisam lai, Pasal bek a hoih hang nupa kaal sung nuam thei tuan lo, cih bangin mimal muhna a gelh nuam ngiat mi pawlkhat om uh hi. Muhna nangawn eima muhna bek a thupisak, eima thu bek thu a sa, eima ngaihsutna bek ngaisutna man bangin i muh lai teng midangte muhna le midangte lungsim kimuhsak thei ngei lo ding hi.

Laisimna in hih bang lunsimte hong khel thei hi. bang hang hiam cih leh lai khat a kigelh ciangin laigelh pa in ama lungsim bek ahi lo, ama sim ngei laibu tuamtuamte le amah muh ngei midangte lungsim tuamtuamte gawmin lai sungah gilh khia hi. Tua manin laisimte in mitampite ngaihsutna a kigawmin lai sung pan thei mu thei uh hi.

Gentehna, America gam ka tun ma-in America gam thu a kigelhna laibu pawlkhat sim ka hih manin a mun ka tun ciangin a mun a omte theih loh ka theih thu pawlkhat na om zaw lai hi.

Mi pawlkhatte in phuahtuam thu ci diam, thupiang taktak ahi lo, bawltuam tangthute sim huai lo hi, ci uh hi. Tua bang muhna zong muhna man hi khin lo hi. Gentehna, ziauphuah a siam mahmah mi khat thu a kigelhna phuahtawm tangthu khat na sim ciangin mi bangci khem ding cih ngahsutna na neih ding hi lo hi.

Khemna bangci hong pai thei, mikhemte in bangci mi khem uh, cih na muh nading ahi hi. Tua manin lai a sim, laisim a hat mi peuhmah kimawk khem zo pakpak lo hi. Lai a kici khempeuh a sim huai lo lai cih om lo hi, ci-in siapite in na gen uh hi. Amau gennopna ah, Lai simsim peuh le cin na nuntakpih ding le na pelh ding na khentel thei lel ding hi, ci uh hi.

Laibu khat le nih bek simin tua sunga thute 100% na zuih sawm leh na zuih lampi khial thei ding hi. Tapidawte adding theih ding a ksiam khat om hi. Pasian kammal Laisiangtho pen lai dangte bangin sim ding hi lo hi.

Na theih a tam ciangin na teel ding hong tam semsem ding hi. Na teel a tam leh na tel tam semsem ding hi. Na theih a tampi lak pan khat na teel khiat ding hi a, na teel khiatte a kigem ciangin na tel taktak thu hong om pan ding hi. Teel a tam kei leh na tel tawm ding hi. Na khuak sungah nangma aituam ngaihsut ding thu a om kei leh midangte thu na ngeihsut lel ding hi.

Na ngeihsut khempeuh nangma aituam neih ahih ding thupi hi. Na ngeihsut khempeuh midangte thu ahih leh ngaihsut huai kha dingin ka um hi. Midangte thu na ngeihsutna pen a si ahi khin lo hi. Ahi zongin nangaihsutna a tam zaw midangte hoih lohna, midangte minsiatna, midangte ginatlohna, midangte thasemna, cih bangin a sialam muhna ahih khak ding hoih lo hi.

Laisimna in a hoih lo, a thupi lo, manh a nei lo, a kisam lo ngaihsutnate khuak sung pan kiamsak thei hi. A hang pen tuate mun ah na laisim thute in munle uh ahih manin na laisim a tam semsem leh na ngaihsutna siang semsem ding hi.

Bang laite sim ding cih pen na lunggulh thu nam tawh kisai ding hi. Mi pawlkhatte in a lunggulh thu namte sim lo uh ahih manin lai a sim uh ciangin ihmut suak ci pahpah uh hi. Kei zong hun khat lai-in tua bang mah ka hi hi. Ahi zongin ka lai sim ding pen ka lunggulh thu nam ka sim a kipan-in laisim sangin a nuam zaw nasep om ka sa nawn kei hi.

Bang hangin nasep ci ka hiam cih leh laisim cih pen cimphawng a neih ding ahi kei hi. Nasep mah bangin hun piak ding le hanciam ding kisam hi. Cimphawngin lai na cim leh na cim bek hong phawng dinga na cim hong phawn khit ciangin a mawkna suak ding hi. Job Cinpi (Zomi laisim nuamte)