Singapore – India vanleng sungah Samsung Phone khat meikhu pusuak in ki patau mahmah

Singapore – India vanleng sungah Samsung Phone khat meikhu pusuak in ki patau mahmah

Zanni Friday (23 September) ni in Singapore pan India gamlam zuanin alengkhia vanlengtung ah Samsung Mobile Phone khat meikhu pusuak ahih manin ki patau mahmah cihthu AFP panin kiza hi. Samsung Smartphone tepen Battery nawngkaina om ahih manin, Samsung Company te’n Phone Unit 2.5 Million te amau kiangah apkikding in asapzawh uh asawtlo in hihbangin thusia apiang ahihi.

Tua vanleng pen Airline IndiGo te hi a, Singapore khuapi panin India gamsung Chennai khua zuanin alengkhia ahihi. Airline te ii genkhiatna ah Passenger khat ii akhuttawi Hand Luggage sungpan in meikhu pusuak cihi. Tua Samsung Phone pen nungin Company te ii asapkik Model tawh kibanglo ci uh a, hih meikhu apusuak pen Samsung Note 2 Model te ci uhhi.

Airline te ii Statement bawlna ah vanlengsung aom Passenger pawlkhat in meikhu gimnam za uh ahih manin, vanlengtung ah nasem Cabin Crew te kiangah zasakpah uhhi cihi.

Cabin Crew te’nzong meikhu gimnam tawh zongpah uh a, Passenger khat ii Baggage sungah akikoih Samsung Note 2 pan ahihlam mukhia uhhi.

Cabin Crew te’nzong meiphelhna Fire Extinguisher tawh kappah uh a, tuakhit ciangin tuisung ah diah uh cihi. Vanleng pen bangmah nawngkaina omlo in, atuknading mun Chennai khua ah buaina omlo in tuthei hi.

Samsung pen leitung ah Mobile Phone abawlkhia Company alianpenpen in aki ciamteh khat hi a, ahi zongin nungdiak Samsung Note 7 te ah akizang Battery te Charging bawllaitak in meikuang thei cihtawh hongminsia mahmah uhhi.

Tua buaina hangin Company in azuakkhiatsa Mobile Phone Unit 2.5 Million te amaukiang ah aki apkik nadingin samkik uh a, asetvan laihsakding uh cih kiza hi.

Samsung te mindai kawmkal ah Apple Company te ii iPhone 7 in min ngahlawh a, tulaitak iPhone bekbek ki lunglut ngeingai zawta hi. ZD Sawltak #zomidaily