Singapore, Choa Chu Kang vengsung aom innkhat ah akizang puansawpset “Samsung Washing Machine” pen thakhatthu in meikangvat cihi. Nung Thursday ni in thupiang hi a, abeisa kha 6 sungah Samsung Washing Machine akat nihveina hita hi.
James Tan kicipa in Straits Times te tungah agenkhiatna ah tua Samsung Washing Machine pen “Spin Mode” akipei valval laitak in mei akang cihi. Amau innpen Choa Chu Kang Avenue 4, Block 455 ah hi a, zingsang 9:40am hunpawl in akang ahihi.
Kum 38 aphakhin ahi inntekpa James Tan in mei amihvat ciangin bangthu om hidinghiam ci’n a etkhiatleh meikhu ngimna za masa hi. Tuaciangin a etphei ciangin puansawpset akang nahimawk hi.
Anhuanbuk sungah akisuang belkhatpeuh meikang ahidiam cih a upmawh laitak in, Samsung Washing Machine panin meikang cih atheih ciangin lamdang kasa mahmah cihi.
Amahzong amanlang in tui bel nihtawh puakpheipah in, tuaciang in amei mitpah hi.
Hih puansawpset meikatna hangin aliam kuamah omlo a, ahi zongin inntek James Tan in apualam kavakkhiatkal ahihleh phadawm hi. Inn ah kum 60 valkhin kanu khatguakbek aom hizenleh, amahlah atukkhitzawh hoihtak lampaithei nawnlo ahih manin lauhuai mahmahding cihi.
Samsung Washing Machine pen aluikhin ahih hangin meikang zahliang dingin ka lamen kei. Asiacip cihbang hilo in akizangzang laitak meikang ahih manin lamdang hi ci’n genkhia hi.
Singapore Civil Defence Force te kiangah hihvai Report bawl uh a, bangci bangin meikangthei cih kumpi thunei te’n kancianding uh cihi.
Samsung Company te’nzong puansawpset athakkhat piakkiksawm uh a, ahi zongin Samsung sangin adang Brand lunggulhzawta uh ahih manin sanglo uh cih kiza hi.
Nungkum November khasung inzong Singapore, Bukit Panjang aom innkhat ah Samsung Washing Machine meikang ngei hi. Dailenbuk umna “Toilet Wall” teng leh Ceiling, Air-con Pipes cihteng meikanggawp ngei hi.
Related: Singapore ah Samsung puansawpset khat meikang
Samsung Company te’n agenna ah Electrical Short Circuit hang hi ci’n genkhia uhhi. Tua puansawpset pen tuinel lakah kikoihkha ahih manin, Electrical Short Circuit piangin meikang akipan ci uhhi. ZD Sawltak #zomidaily
Comment piaknop aomleh...