Singapore aom vanlengtual in “World’s Best Airport” ciaptehna ngahleuleu
Singapore gamsung aom “Changi International Airport” in leitungbup Airport khempeuh lakpanin ahoihpenpen “World’s Best Airport” ciaptehna ngahkik leuleu hi. 2013 kum panin tukum 2017 dong akizom sitset in “World’s Best Airport” cih pahtawina angah ngekngek uh hi a, kum 5 sungsitset akizom in angah uh hizenhi.
Hih pahtawina pen “Skytrax World Airport Awards” te piak uh hia, hihbang in apiaktheih nadingin Survey Questionnaires 13.82 Million veibang abawl uh cizen hi. Khatlehnih peuh ii ki deihsakman, meltheih tanau ahihmah in deihsakna tawh pahtawina akipia cihte hihetlo a, mihing 13.82 Million tungpan in Survey akibawlna tungtawn in akiteelkhia ahihi.
Kumsim in Research Firm SkyTrax te’n ahunhun in Survey abawl uh hi a, tukum “World’s Best Airport” cih pahtawina apiaktheih nading un July 2016 panin February 2017 sung Survey abawl uh ahihi.
Tua Survey pen gamtuamtuam panin Nationalities 105 bangin amau deihciattek ateel uh ahihi. Survey zong munkhatbek pan akila hihetlo in, leitung gamtuamtuam aom Airports mun 550 panin Survey akibawl ahihi.
Survey kibawlna sungah athupi diakin akidongpen Check-in, arrivals, transfers, shopping, security and immigration, departure cihte hiphadiak hi.
Singapore gamsung aom Changi International Airport pen atuam phadiak khat hi a, Service hoihphadiak ahih manin pahtawina kum 5 vilvel akizom in angah dingmahzong ahihi.
Airline lounges, Baby care roo, Baggage storage, Business centers, Cactus garden, Children’s playground, Clinics and phamarcies, Convenience stores, Free-to-use rest areas, GST refund, Hair, Beauty and Spa, Hotel reservations counters, Information and Customer service counters, Interactive art, Internet connection, Kinetic rain, Money changers, Piazza garden, Post offices, Sculptural tree garden, Swimming Pool with Jacuzzi, Water lily garden cihbangin vanlengtual khat hinapi in, Facilities leh Services akimin ki ngahsakmawk uh ahih manin, Passengers anawkkha te pen alungkimlo omlo cihtheih himai hi.
Leitung vanlengtual ahoihpenpen “World’s Best Airport” Top 10 sungah alutzo tepen Asia gamsung leh Europe gamsung aom Airport te vive hizawmawk hi. USA gamsung aom Airport te Top 10 sungah alutzo khatzong omlo a, North American Airport sungpan in akideihpen nangawn Canada aom Vancouver International Airport ahihi. Tuazong 13 pek hipan hi.
World’s Top 10 Airports in akiciamteh tepen anuai abang ahihi:
- Singapore Changi Airport
- Tokyo International Airport (Haneda)
- Incheon International Airport
- Munich Airport
- Hong Kong International Airport
- Hamad International Airport
- Chubu Centrair Nagoya
- Zurich Airport
- London Heathrow Airport
- Frankfurt Airport
Singapore “Changi International Airport” pen limtak in ki puahbeh sansanlai a, 2019 kum kipatlam in Jewel Changi Airport cih honbeh laiding uhhi. Tuapen inndawl 5 phasakding uh a, leisung ahzong Basement Floors dawl 5 mah phasak in tuasungah nektheih leh vanzat tuamtuam zuakna Outlets bekbek 300 bang koihding uhhi.
More: Singapore Changi Airport sungah numei khat kum 8 sung teengcip
Tuaban ah 40 Meter (Pi 131) asangin akibawltawm tuizeu “Indoor Waterfall” zong koihding uhhi. Indoor Garden zong inndawl 5 tak apha in bawlding uh a, tuasung ah Brazil, Australia, Thailand leh USA panin singkung namtuamtuam 2500 leh a etlawm lopa namtuamtuam 100,000 bang koihding uh cihi. (2,500 trees and 100,000 shrubs) Atung a Photo pen 2019 kum kipatin ahonthakding uh limlahna ahihi. ZD Sawltak #zomidaily
Comment piaknop aomleh...