Singapore ah Zika Virus ngah mi 38 kibehlap, akigawm mi 189 hita

Singapore ah Zika Virus ngah mi 38 kibehlap, akigawm mi 189 hita

Tuni Friday (02 September) ni in Singapore gamsung ah Zika Virus angah mi 38 ki muhkhiatbeh ahih manin, tuniciangdong Singapore gamsung ah Zika Virus angah vekpi pen mi 189 tak hita cih CNA News pan kizakbeh leuleu hi.

Ministry of Health (MOH) leh National Environment Agency (NEA) te’n Joint Statement abawlna panin agenkhiat uh hi a, tuni aki mukhiathak mi 38 lak ah mi 34 tepen Aljunied Crescent/Sims Drive/Kallang Way/Paya Lebar Way cih kuamsung tengpan in aki muhkhiatbeh ahihi.

Agency te genna ah hih Zika Virus akilawh gawploh nading in tulaitak athupipen ahihleh Vector Control mah hiphot hi ci uhhi. Tua ahih manin Aljunied Crescent, Sims Drive, Kallang Way, Paya Lebar Way kuamsungteng ah natna akilawhloh nading in thoza kapsakden uh a, siansuahden uhhi.

NEA te leh Inter-Agency Dengue Task Force te in Vector Control nakpi in semkhawm uh a, sanginn, inn ki lamthakna Construction Sites, Expressway tuinin luankhiatna cihte akipan thoza kapin thokang aomloh theihtheih nading in hanciam mahmah uhhi.

Nisim in hibang in Zika Virus ngah hongki behlap toto mawkleh lauhuai semsem khading hi. ZD Sawltak #zomidaily