Sihna in nangtung vang neinawnlo ~ Rev. Fr. Damian Dal

Sihna in nangtung vang neinawnlo ~ Rev. Fr. Damian Dal

Sihvui hun in asang, mihing ngaihsutna in atelzawh loh, upna thusungah eite hong nuntakpih hi. Sihvui hun te ah i ki hel sialsial in, thu namthum i phawkden hi: (i) mihing a piang, sihna kipelh theilo, (ii) mihing a piang nuntak hun tom, (iii) mihing apiang vanmi melpua a thokik ding, cih thu ahihi. Sihna in khual neilo a, sih hun ding hong kigen khollo hi. Sihna in supna lianpen hi a, na khempeuh te bei mang ta hi. Abei lo thu khat om a, tua in a thokik Topa tungah i upna ahihi.

A thokik Topa sungah i nuntak na i phuta, ama tungah kilam ihih man in, (Col 2: 6-7), sihna tungah upna in malngal na hongpia hi. Upna hangin, sihna in mihingte tungah vangnei zonawn lo a, sihna ii vangletna in eite hong susia zonawn lo hi. Nuntakna in sihna sangin vanglian zaw a, sihna in nuntakna susia zo lo hi. Pasian in nuntakna phungpi leh nuntakna taktak hi a, sihna in Pasian piak nuntakna tungah gualzawh na lakding hanciam himah ta leh, sihna a zo Topa, Jesu hangin “sihna aw nagu koi ah omzenzen ahi hiam” i ci thei ta hi.

Christu Jesu sungah tuisawpna (baptism) angah khinsa mi khat in, mihing si mawkmawk ahi nawn kei hi. Amah in, Jesu Topa sungah, Jesu Topa tawh asikhawm ahihi. Jesu sungah sihna in mihing sihna gu, mihing sihna tangthu, mihing sihna thuzung khempeuh kikhel sak hi. Jesu sungah asi mi in, Jesu Topa tawh athokik dinghi cih thu Laisiangtho sungah honghilh ahih manin, Topa i phat hi. Sihna leh thawhkikna cih thunih kikal ah eite ih nungta hi.

Sihna in nakhempeuh kikhelsak ahih manin, sihciangin nakhempeuh te angei bangnawn lo ta hi. Tua kikhel na hangin, eite dah in i kap hi. Tua kikhelna in eite telna, theihna, muhna te sangin, saangzaw ahihman in, eite in i telloh thu, i theihloh thu, i ciapkhak ngeinai loh, i muhkhak ngeinai loh nuntakzia te hangin sihna hongtun ciangin, i gen ding thu, i paukhiatding kammal nangawn i muzo nawn kei hi.

Ahi zongin, nakhempeuh akikhelsak sihna in, a um mite adingin, Christu Topa sungah athak nuntakna lamah kikhelna lianpi hi cih hongthei sak ahih manin, upna hongpiak pilna, theihna in eite tha hongdim kik hi. Topa minthangna hi ta hen!

Sihvuina hun in, Christian taktak te adingin, leitung vai tangthu tuanthu suthun ahi masa kei hi. Sihvui hun ihcih in Sihna leh Thawhkikna thuthuk ahi, Christian te upna thu tawh kisai in, athu pi penpen thu nih thakhat thu in ahawm agen ihihi. Leitung pan hongpaisan mikhat adingin, leitung thu te kisam nawnlo hi. Ama adingin, ama utna, atupna, adeihna, anuntakpih dinga atel Sihna azo Topa thu leh la te ihsutsut ding, amah tawh Topa thu, Topa la anunung ihawmkhopna ahi zaw hi.

Tu in, hong nusia, i it, upna thu sungah eite tampi Pasian thuman thutak leh, sacramentu te tawh hongvak, hongpattah, honghuai, hongkem hongmapi, Pasian siampi hihna sungah ka naseppih, Fr Isidore Tuang Khan Pau ii leitung hun nunung ahihna thu i thei ciat hi. Amah kua hiam? Amah in mitampi tak te, tuisawpna tawh Pasian tanu/pa asuaksak pa ahihi. Eite adingin gimna, natna, lungkhamna thuak mah taleh, biakpiakna tawh Pasian thupha hongngetsak pa ahihi.

Eite mawhna te Pasian mintawh hongmaisak pa hihi. Sathau siangtho nuhna tawh, Pasian hehpihna mi tampi te tungah ahawm khia pa Fr Isidore Tuang Pau ahihi. Kiteen na sacramentu hongpiak na tawh, Pawlpi tangin eite Pasian mai ah asiantho kiteen na hongngah sak pa hihi. Amah hangin, vantung thupha, leitung thupha tampi i ngah om hi mah tase leh, lungkham na, dahna, khuangaih lunglenna athuak hun in, i dahpih kei khading hi; zong i theihpih i telpih kei phial kha ding hi.

Tua zahdong in, mite ii theihloh in anungta Fr Isidore Tuang Pau ahihi. Ama tungah itna leiba aba tampi i om kha ding hi. Tua te khempeuh ama kham lukhu ding hita hen. Ama siampi hihna sungah, asiampi khat a alamsang i Topa Jesu in, ama kha nasang in vangliatna puanpak tawh natuam ding ahihman in, lungdamna tawh hong it Topa i phat hi.

Christu Jesu sungah upna mite pia in, tawisawpna tawh mi tampi te Pasian tanu/pa suahna apia Thuciamthak sungah siampi ahi, Fr Isidore Tuang Khan Pau tungah sihna in vangliat na nei nawnlo hi. Aki cing nuntakna apia Topa in sihna zawhloh nuntakna sungah amah kikhelsak ta hi.

Kong it uh, kong zahtak uh, siampi hihna ah, ka naseppih, Khathu ah kote pa ahi Rev. Fr Isidore Tuang Khan Pau aw, leitung na hun nunnung ni in, hih kalai tawh, leitungah Pasian na itna hangin, nasep nabawlna te kongpah tawi hi. Tawntung nuntakna sungah omta nahih manin, i Topa Jesu Christu sungah khutlen in kongnoh set hi. Hong it tawntung, By Rev. Fr Damian Dal – Leuven, Belgium (tawmvei) 21 November, 2014