Sihding a patau lote

Sihding a patau lote

1. Billy Bray (1794-1868)

A paina peuhah “Hallelujah Amen!” ci-in a awng den khat hi. A pianthak zawh kum 12 a phakin a Iawmte khat in, “Billy, Leitungah bang thuthu piang a hia?” ci-in a dot leh “leitung tawh ka kinahvawh loh kum 12 pha ta,” ci-in dawng hi. A sih kuan ciangin siavuanpa in sawtvei nungta nawn lo ding a hihna gen hi. Tua ciangin ama’n zong, “Hallelujah Amen!” kalsuan simin inn tawh ka kinai semsem hi. A sawt loin inn ka tung ding hi,” ci-in lawp takin gen hi.

2. John Wesley (1703-1791)

England gam khanlawh nading a Pasian’ mizatpa leh leitung ah Methodist pawlpi a phuankhiapa hi. A sih kuanin mi khat in “Hun tam neilua nawn lo na hih manin na hun neihsun teng koici zat na sawm hiam?” a cih leh “Topa kiang ka ciah ma-in khangnote tawh kimu nuam lai ing. Tua khit teh lungnuam takin Topa kiang ciah ning,” ci-in dawngkik hi.

3. John Bunyan (1628-1688)

Pilgrim’s Progress a kid leitung a laibu minthang mahmah a gelhpa hi. A sih kuanin a thugenna ah, “Pumpi sihna in Christiante bangmah buaisak zo lo hi. Banghang cih leh Christiante adingin pum­pi sihna pen thonginn sung pan kumpi inn sungah lutna, galte’ khutsung pan lawm itte’ kiang zuatna, a lauhuai huihpi sung pan innnuam sungah tawlngakna, le gual-lelhna mun pan tawntung minthanna mun lutna hi lel hi,” ci hi.

4. James Hudson Taylor (1832-1905)

China Inland Mission a phuan­khiapa hi a, Sengam sungah sangmang 800 puak hi. A sih kuan ciangin, “Ka tha bei lua a, Lai Siangtho nangawn ka sim zo nawn kei hi. Thu zong ka ngen zo nawn kei hi. Naungek khat bangin Pasian’ khut sungah ka om ngiungeu hi. Ka sep ding teng ka zo kuan ta hi,” ci hi.

5. William Booth (1829-1890)

Salvation Army a phuankhiapa ahi hi. Siavuanpa in a sawt lo-ip a mit in khua mu nawn lo ding a, sawtvei zong nungta nawn lo ding ci-in gen hi. Tua ciangin a­ma’n zong,”Hun tam nei nawn lo ka hih manin nidang sangin nasep ka hahkat zawk kul ding hi. Ka mit in khua a muh nawn kei phial mah leh zong, khua ka muh lai zah mahin ka sem veve ding hi,” ci hi.

6. John Adam (1735-1826)

US President nihnapa ahi hi. Kum 80 pawl a phak lai-in zingsang khat lam a siauh leh lampi ah mi khat in, “Bang na cici hiam?” ci-in dong hi. Ama’n zong hih ka leibuk pen a tung lah kehkeh ta, a khuam teng zong muatmuat ta ahih manin ka innthak ah kituah baih thei kha ning” ci-in maitai takin dawng kik hi.

7. Werner Von Braun (1912-1977)
American Scientist-te sung pan a minthangpen Jews mipil khat hi. July 20, 1969 ni-in Americante khapi tung a kahna uh rocket zong ama’ bawl ahi hi. A sih kuan ciangin a mah a veh a lawmte’ kiang­ah “Christiante’ adingin han pen lamtawp hi nai lo a, tawntung hun ading a kipatna hi pan hi. Christiante isih teh i kha penleitung sang anuam zaw munah galkah hi,”ci-in hanthotna neizawtek hi. ZangKong Awging